Khawpui pawna ruang phurh
man km khat zelah Rs.40 bituk
Mizoram sawrkarin state chhunga anmahni khua/ venga ruang hawpui man a tum tur thu a puan fel hnu ah, ruang phurh man chungchangah chinfel ngai awm chu chinfel a ni tawh a, khawpui (city/ town) atanga chhutin kilometre khat zelah km.40 a ni anga, a let leh lam nen Rs.80 tur a ni ang.
Mizoram sawrkar chuan 2024 September 1 atang khan ruang phurh man hi a tum tan a, a buaipuitu Social Welfare deparment chuan a tirah hetihlaia State Transport Authority-in man chawia lirthei hman hawh man a bituk sa nga ringin, hemi ang hi chuan lirthei cheng nuai 7 aia sang loah chuan km khatah Rs. 25 (a let leh lam nen Rs.50) a ni a; lirthei cheng nuai 7-12 inkarah km.ah Rs. 30 (total Rs.60), nuai 12-17 inkarah km.ah Rs.35 (total Rs.70) niin, nuai 17 chunglam lirthei chu hman phal a ni lo thung. Department hotute chuan an thil ruahman dan hi a tul anga tih danglam zel theih a nih tur thu an lo sawi lawk tawh a ni.
Hemi rate ang hi chuan tlan harsa an tih thu The Aizawl Post-in a zawhnaah Mizoram Private Ambulance Association (MPAA) chuan an lo sawi tawh a. An rate hmanlai chu km ah Rs. 40 (total Rs.80) a ni tih sawiin, hemi chungchangah hian department lam nen an indawr zui a ni.
STA hian 2024 December 23 khan ambulance hman man hi siamtha in, ‘outside city/ town area’ ah ambulance/ hearse/ morgue van hman man hi km khatah (garage to garage) Rs.40 a ti a. 2024 December 24 atanga hman tan turin hriattirna a tichhuak a ni.
Hemi ang hian MPAA-a tel te tan chuan ruang phurh ngai chu anmahni hnenah ‘direct’ in thlen mai theih a ni tawh a, an ni hian Social Welfare department lamah ‘phurh man’ hi an bill zui mai tawh dawn tih department hotute chuan an sawi a. MPAA member ni kher lo lirthei dang pawh hman theih tho a nih rualin, bill erawh mahniin department lamah an inbuaipui a ngai thung dawn tih sawi a ni.
Social Welfare department hotute sawi danin, bill hi an inpe nghal zel thei rih a, bank account-ah an thunsak nghal thei a ni.
He ruahmanna chungchangah hian ZPM Thalai Hqrs. chuan thuchhuah siamin, Mizoram sawrkarin ruang phurhna senso a tum tur chu lawmawm a tih thu a sawi a. ‘Mirethei leh harsa zawkte tana ruang phurhna tur senso hi thil hautak em em a ni a. He harsatna tiziaawm tura sawrkarin chhiat tawk chhungkuate harsatna sutkianna tura ruang phurh man chungchanga ruahmanna mumal leh fel tak a siam hi a lawmawm a ni, a ti.
Khawpui pawna ruang phurh man km khat zelah Rs.40 bituk
