Manipur buainaah silai a la puak zel a, tun hnaiah H Khopibung lamah boruak a tang leh; Thawhtanni leh Thawhlehni khan an inkap nasa tih thu dawn a ni.Kangpokpi district-a H Khopibung khua leh a chhehvelah Zo hnahthlakte leh Meitei an inkap nasa a, Meitei lamah nunna chan an awm nual.
Manipur atanga thu dawn danin, Meitei lam hian hmun thum atangin H Khopibung hi an pan a, Zo hnahthlakte’n lo hriain tan an lo khawh ve a, an inkap ta a ni.
“Kawr dum ha an rawn kal tih report a awm a, hmun thum atangin an rawn pan a, keini lam an lo inring ve nghal a, silai a puak ta a ni,” tiin Manipur-a Zo hnahthlakte hruaitu pakhat chuan The Aizawl Post a hrilh.
Meitei hian pawl chak tak, firfiak taka kal Arambai Tenggol an nei a, anni hi tun buainaa a meizang hlaptua ngaih niin, Manipur sorkarin a thlawp nia ngaih a ni bawk. Kawr dum an ha thin a, uniform ang deuhvah an neih a ni.
Zo hnahthlak lamin Meitei lam awm khawm lai an nang fuh a, hetah hian an inkap nasa a, Meitei lamin nunna an chan nasa tih thu dawn a ni.
Thu dawn danin, a ni hnihnaah hian Zo hnahthlak lam hian silai 26 an chhuhsak a, a ni khatnaah 20 vel an chhuhsak bawk. Zo hnahthlak lam hian nunna chan an awm lo niin an sawi.
Tun hnaiah an inep natna Sugnu khua leh a chhehvel chu an boruak a dai rih a, Meitei lam hi an insaseng nge, an chawl nge tih hriat lohvin an thawm a reh rih tih thu dawn a ni.
Churachandpur district-a luta Churachandpur khawpui lak an tum tih thawm a awm thin a, Nilaini pawh khan Churachandpur district daia awm Kangvai panin Meitei hi an kal nia sawi niin, Zo hnahthlakte an lo inralring hman a, mahse Meitei lam hi an kir leh nia hriat a ni.
Khawpuibung lamah Zo hnahthlak leh Meitei inkap nasa
