Khawthlang ram pathumin Israel vau
Britain, France leh Canada te chuan Israel chu Gaza-a sipai chakna a hman a tihtawp lohva puihna lut tur a dan chhunzawm reng chuan na taka hrekna kalpui an tum tih an puang a, Prime Minister Benjamin Netanyahu-a na zawkin an nawr.
Ram pathumten hetiang thu an chhuah hma lawk hian Israeli sipaite chuan Zirtawpni atang khan Gaza pumah beihpui na leh zau zawk an thlak tan a. Netanyahu-a chuan Thawhtanni khan Israel-in Gaza pum a thunun dawn niin a sawi bawk.
“Israeli sorkarin mihring ni tin mamawh puihna phurte a luhtir duh lo hi pawm theih loh leh International Humanitarian Law bawhchhiat theihna a ni,” tiin British sorkar chuan thu a chhuah.
“West Bank-a an ram luah lai zauh tumna pawh keini chuan kan do tlat a, hmalak zel tumna keini chuan tha kan ti lo va, hrekna thlenga kalpui mai a ni ang,” an ti.
Israel hian October 7, 2023-a an ram beitu, Hamas beih let nan an awmna, Gaza hi runin March 2 atang khan damdawi, ei tur leh tuialhthei luhna a dang a. Chawlhkar 11 zet kawng a dan hnuah Thawhtanni tlai atang khan tlem a luhtir tan a, tam thlentir an tum lo tih a puang.
“Israel-in a ram mite hum nana firfiaka chetna a do hi chu an diknaah kan ngai a; mahse, a pum puia inepna boruak kaltir erawh a kawnghmang lo,” tiin khawthlang ram pathumte chuan thuchhuah intawm an siam a. Netanyahu-a sorkar chet dan chu ‘em em a tling’ niin an sawi.
United States, Qatar leh Egypt ramten Gaza-a inkahhai a awm theih nan palai hna an thawk chu an thlawp tih an sawi a, Palestinian ram din chu inrelbawlna hran nen pahnih inkara thil chin felna tha nia an ngaih thu an sawi bawk.
Khawthlang ram pathumin Israel vau
