Mizoram Civil Service officer Daniel Sailo chu an awm mekna, Ainawn Veng khawtlang hruaitute engahmah ngai loa sawi niin, khawtlangin an veng mi ah an ngai bik lo tih an sawi.
Ainawn Veng Local Council & All NGO thuchhuak chuan, Daniel Sailo hian an vengah in leiin August 2023 atang khan an inbengbel a, Local Council leh YMA-in tum engemawzat pem lehkha an dil pawhin pem lehkha neih tul a tih loh thu te, YMA engahmah a ngaih loh thu te sawi a; an awmna YMA Section hruaitute vawi tam hmusit leh chapo takin a tawngkhum thin tih an sawi.
‘Khawtlang inrelbawlna leh kaihhruaina engahmaha ngailo a, khawtlang hruaitute hmusit taka tawngkhuma a diriam thin hi a lungawithlak loh hle,’ an ti.
2024 March 14 zan khan Daniel Sailo hian an in kawtah lei laiin, leivung hi dumping ground atana ruahman niloah a paih a, Local Council-in a hriat rualin a paih chhan zawt tur leh paihna hmun a nih loh thu hrilh turin YMA Section hruaitute lamkalah a tir a. Daniel Sailo hi lo mu tawhin, a nupuiin lo dawngsawng a. Local Council nen pawh phone hmanga inbiak zui a ni a. Tha taka inthlah nia an inngaih laiin, March 15 tlai lamah Daniel Sailo hian YMA Section hruaitute hi an inah kalchilhin, darkar khat chhunga ngaihdam an dil lo a nih chuan FIR thehluha vauin kutthlak duh hial khawpin a che zui tih an sawi.
Hemi boruak hria hian March 15 zan khan Daniel Sailo hnenah thil awmzia sawipui a, hrilhfiah ngaite hrilhfiah turin Local Council leh YMA hruaitute an leng a. Daniel Sailo hian khawtlang hruaitute hi chapo leh hmusit taka lo dawngsawngin, Ainawn Veng a hmuhsit thu leh engahmah a ngaih loh thu te, Ainawn Venga phum a duh loh thu te, chenna tlaka a ngaihloh thute sawiin, tawngkam chhia chi hrang hrang hmangin khawtlang hruaitute a lo tawngkhum a, thu tha engmah sawipui theih a nih loh avangin khawtlang hruaitute hian an hawsan tih an sawi a ni.
March 16 zingah Zonuam Police Outpost-ah Ainawn Veng khawtlang hruaitute lakah FIR a thehluh zui avangte, an khawtlang hruaitute laka a rilru puthmang leh kutthlak duh hial khawpa a chet avangte, Ainawn Veng mipui leh khawtlang hmusita engahmah a ngaih loh avangtein Daniel Sailo hi Local Council, All NGO leh Ainawn Veng mipui chuan khawtlanga chenho pui tlakah an ngai bik loa, a nundan leh chet duhdan enin thenawm khawveng, upa leh tar chak lo, nunaute tan pawh a him tawk loah an ngai tih sawiin, ‘Heng avang hian Daniel Sailo hi Ainawn Veng khua leh tuiah kan pawm theilo a, kan mi leh saah kan ngailo a ni,’ an ti.
Khawtlang zah lotu MCS officer an duh loh thu sawi
