Khawtlanga chenhonaah dan hriat a tul – Khawzawl bawrhsap

Khawtlanga chenhonaah dan hriat a tul
– Khawzawl bawrhsap
Khawtlanga chenhonaah dan kan hriat tul a, dan hriat loh chu dan mitah chhuanlam a tling lo tih Khawzawl district bawrhsap K Vanlalthiana chuan a sawi.
District Legal Services Authority Champhai leh District Child Protection Office bultumin Thawhtanni khan Khawzawlah Outreach Programme for Legal Awareness Campaign neih a ni a a, a kaihhnawih sawrkar department aiawh leh tlawmngai pawl aiawh an tel. Hmanpuitu district bawrhsap hian, khawtlanga kan chenhona kawngah dan hriat a tul a, dan hriat loh chu chhuanlam a tling loa, dan kan neih ho hre zau zel tura inzir a tul tih a sawi.
Naupang leh hmeichhiate chunga hleilenna chungchangah dan ang taka hma lak thin a tul tih a sawi a. Awlsam taka inngaihdam leh mai chu thil tha ber a ni lo, tiin, dan kan hriat angte a taka nunpui a tul bakah midangte zirtir ve zel a tul tih a sawi. Naupang leh tleirawl laka hleilenna social media-a thehdarh a tha lo tih sawiin, nupui/ pasal zawnna leh eizawnna thlenga nghawng nei thei a nih avangin social media-a thehdarh chu dan kalh a ni tih a sawi a ni.
District Court Champhai-a JJB&JMFC principal magistrate Vanlalruata chuan naupang harsatna tawk tanpui ngaite dan ang taka tanpui tura hma lak dan bakah kum 18 hnuailam dan bawhchhiate chunga hmalak dan tur a sawi a. District Legal Services Authority chuan district chhunga mirethei leh harsa zawk, naupang leh midang chu inpuih man chawi ngai loin dan angin an pui thin a, an dikna leh chanvo humhalh sak chu mitin mawhphurhna a ni tih a sawi.