Mizoram sorkarin Indian Airforce kuta Lengpui Airport hlan a tum a, a remti lotute thawm a ring telh telh. Airport awmna khuaa tlawmngai pawlte pawhin Airforce kuta hlan hi an phal lo.
Lengpui khaw VC te kaihhruaia tlawmngai pawl hrang hrangte inthlunkhawmna Lengpui Joint Committee te’n Indian Airforce kuta Lengpui Airport hlan chungchang hi an ngaihtuah tawh a, Indian Airforce kuta hlan hi an phal lo.
Chumi hnuah Mizoram sorkarin Lengpui Airport chungchang zirchiang tura a tihte nen an inkawm a, mahse an dinna an sawhsawn lo.
Lengpui YMA hruaitute chuan sipai kuta airport hlan hi an duh lo a, an ngam lo tih an sawi a, force-mite nena inhnaih taka awm hi tha an tih loh thu an sawi. Tun hma deuhah pawh Lengpui khaw ramah sipai dah tumna a awm tawh a, chu chu an lo remti lo tawh tih an sawi bawk.
“Airforce kutah airport hi a awm a nih chuan force-ho nen kan inhnimhnai dawn a, force mite nena inhnaivaia awm hi ngamawm kan ti lo a ni. Anni an rawn awm chuan kan ram ngeiah kan chep dawn tlat a,” YMA hruaitu pakhat chuan a ti.
“Force mite kan khaw ramah an awm a nih chuan kan khaw ram ngeiah kan chep dawn a, tuna kan thawh thinte pawh kan thawh theih loh phah dawn a, ram kan chan dawn tihna ang a ni dawn a,” a ti bawk.
Central YMA dinna chu Lengpuia YMA branch pahnihte dinna a nih hrim hrim thu a sawi a, Central YMA-in Airforce kuta airport hlan an phal loh avangin anni pawhin an phal lo tiin a sawi.
Airport hi force mite kutah awm ta se an khaw mite eizawnna pawh a nghawng ang tih hlauhna a awm thu an sawi a, airport-a hnathawk an khaw mite hian an hna an chan a hlauhawm tih te pawh anni tan ngaihtuah loh theih loh a nih thu a sawi.
“Tunah hian airport-a hnathawk kan awm ve sep sep a, heng mite hian an hna an chan ang tih kan hlau a. Chu chu ngaihtuah loh theih a ni lo,” a ti.
Lengpui khawtlang hruaitute chuan airport-a hnathawkte bakah taxi leh thingpui dawr nen, an khuain Lengpui Airport hi an hlawkpui tih an sawi a, taxi pawh 100 vel an neih thu te, tun hnaiah homestay a ding nual a, chung te pawh chu an khuain eizawnna lamah an hlawkpui tih te an sawi.
Khawtlangin Airforce kuta Airport hlan phal lo
