Khawvel court in min dang thei lo

Israel chuan Hamas te laka chakna a chan hma chuan a bei chhunzawm zel dawn a, tute mahin min dang thei lo, khawvel court pawhin min dang thei lo tiin Prime Minister Benjamin Netanyahu chuan a sawi a. Gaza indona hian a ni 100-na hmel a hmu ta bawk.
The Hague a International Court of Justice chuan South Africa in Israel chuan Palestinian te lakah genocide a kalpui a tih avangin ni hnih chhung hearing an nei a. Israel chuan he puhna hi hnawlin South Africa chuan court chu Israel in vansang leh lei lama a beihna chu titawp tura hrilh turin a ngen a ni.
“Tumahin min dang dawn lo. The Hague in emaw axis of evil in emaw tute mahin min dang dawn lo” tiin Netanyahu chuan Israel mipui te hnenah television kaltlangin a puang hmak thung.
World court ngaihtuah case te hi a kum akum duh thin a ni a. mahse hmalakna hmasa erawh tunkara puan mai theih a ni thung ang. Court ruling te hi dan anga kalpui tur a ni chungin a tak taka kalpui harsa tak a ni. Netanyahu chuan indona tihtawp a nih nana hmalakna reng reng Israel in a hai dawn tiin a sawi hmak thung.
Indona titawp turin Israel chuan nawrna nasa tak a tawk tawh a, ni 100 chhung indona kalpui tawhah Gaza-ah Palestinian 23,000 chuangin nunna an chan tawh a ni. Israel hi US chuan diplomatic leh military support a pe tlat thung bawk.
Israel chuan indona tihtawp chu Hamas te tan chakna a ni a ti hmak thung. Gaza indona hi October 7, 2023 a Hamas leh militant dang ten Israel luhchilha mi 1,200 an tihhlum ringawt vang a ni a. Mi 250 vel salah an man bawk a, a then te chu lung in tang inthlengin chhuah an ni chungin a zahve vel an la kawl anga ngaih a ni.
Gaza buaina hian helai region ah buaina nasa zawk a thlen hlauhna a lian hle a. Hlauh ang ngeiin Iran thlawp Yemen a Houthi rebel leh Lebanon a Hezbollah te chuan chet an la zui ve nghal a ni.
Houthi te chuan Red Sea a commercial ship te chu missile hmangin an bei a, hei hi duh lovin US leh Britain te chuan Houthi rebel te hi missile leh indo thlawhna hmangin an beilet ve thung.
Chutihlaiin South Africa chuan international court hnenah Gaza a nunna chan tam lutuk chu chhuanlama siamin Israel chu a khing ta a ni. Israel chuan South Africa petition chu behchhan nei lo tia sawiin court chu hnawl turin a ti thung a. Hmelma te beilet turin ramin dikna a nei a ti ve thung.