Khawvel Ek In Ni hmang
United Nations-in khawvel huapa a kalpui thin angin November 19 kha World Toilet Day (Khawvel Ek In Ni) a ni a, he ni pual hian PHE department leh Central YMA tangdu chuan Thawhlehni khan hun an hmang.
Hmanpuitu PHE minister Prof. Lalnilawma chuan he Ni hi khawvel invawn thianghlimna lama hun khirh thleng chho mek hmachhawn tura mipui chawk phur thar tura inzirtir leh inhrilhhriatna huna hman thin a ni tih a sawi a. “Kan hriselna leh changkanna hi kan ek in nen a inkaihhnawih vek tih mipuiin hre thar ila, sawrkar laipuiin kum 1986 atanga a lo kalpui tawh, ramchhung faina programme ah a rawn tin bing ber chu ek in a ni a, kan inthiar dan leh kan ek dehral dan hian kan ei leh in zawng zawng bakah kan hriselna chena a kaihhnawih vek vangin kan ngaih thutak a hun tawh takzet a ni,” a ti.
World Toilet Day denchhen hian sawrkar laipui chuan rampum huapin December 10 thlengin campaign kalpui turin ruahmanna a siam a, mimal leh vantlang inthiarna thawmthat leh cheibawl hna thawkin, ek in him tha pawimawhna uar zawka inzirtir a ni.
World Toilet Day inkhawmah hian PMU PHED director Er H Duhkima’n thupui a sawizau a; PHE engineer -in- chief Lalrothanga leh Central YMA general secretary Dr Malsawmliana ten thu an sawi a. PHE officer leh staff-te bakah khawpui chhung YMA branch hrang hrang hruaitute an tel bawk.
Khawvel Ek In Ni hmang
