Khawvel puma infiammi
hlawh hnem ber Ronaldo
Infiamna huang leh huang hrang hranga khawvela sum lalut tamte chhuia zirchiangtu Forbes report thar berah Arab team Al Nassr a zawm hnu khan Cristiano Ronaldo chu khawvel infiammite zinga hlawh hnem ber a ni.
Nikum December thla khan Portuguese hian kum 2025 thleng cham turin Saudi Arabian club a zawm a, Forbes tarlan danin kum 38 mi hian tunhnai thla 12 liamta chhung khan US dollar maktaduai 136 (£108.7m) tehreng a hlawh kai pha a, a club thara a hlawhin a dinhmun a chawikang pha tel bawk a, kum 2017 hnu lama a vawikhatna atana Forbes list-ah khawvela infiammi hlawh tam ber nihna a rawn hauh leh ta a ni.
A club thar Al Nassr nen contract an ziah laia a hlawh tur zat hi official-a puanzar ni lo mah se Portugal forward hian kum khata euro maktaduai 200 (£176.5m) chuang a hlawh pha dawn niin media lamin an tarlang a, heti a nih ngat chuan kum thara Forbes list thar tichhuah leh turah pawh chiang lehzuala a ler a luah leh ngei a rinawm!
Argentina World Cup-winning captain Lionel Messi pawhin beisei a rawn pha chho leh a, Forbes tharah hian pahnihnaah awmin, kum khat liamta chhunga a hlawh zawng zawng an belh-khawmsak chu US dollar maktaduai 130 (£103.9m) a ni.
Forbes top 10-ah hian basketball star LeBron James leh boxer Canelo Alvarez lang vein, infiammi chawl tawh zinga a sang 10 luah pha awmchhun 20-time tennis Grand Slam champion Roger Federer chuan pakuana a la hauh pha.
Los Angeles Lakers player leh NBA great ni bawk LeBron James hian US dollar maktaduai 119.5 lalutin, Mexican boxer Canelo Alvarez kutah thla 12 kalta khan USD 110 million a lut ve bawk.
Parukna luahtu world number one hlui Dustin Johnson leh pasarihna Phil Mickelson-te chu kum 2020-a hmuh tur awm Tiger Woods hnu lama golfer zinga top 10 chuangkai leh thei hmasaber an ni.
Nikum list-ah khan American Johnson hi top 50-ah pawh a lang pha lo kha a ni a, mahse, sawi hlawh taka Saudi suma inelna buatsaih thar LIV Golf Invitational Series-a golfer hming hraw chin he series zawm hmasaber a nih hnuah Forbes ranking-a a dinhmun a kang ta dawrh a ni.
Major title pahnih la tawh hian a champion vawihnihah khan US dollar maktaduai 18 (£16.2m) hui tlingin, LIV Golf championship-a a champion manah khan US dollar maktaduai 107 (£85.5m) a hlawhchhuak bawk.
Forbes tarlan danin, thla 12 liamta chhunga US dollar maktaduai 106 (£84.7m) hlawh kai pha Mickelson chuan a career-ah US dollar vaibelchhe khat a hlawh tling tawh a ni.
PSG forward Mess club team mate leh France captain nio bawk Mbappe chu he list-a infiammi lang pha naupang ber niin, kum 24 mi hian US dollar maktaduai 120 hlawh phain, top 10-ah pathumna a luah
NBA-a vawili champion tawh Stephen Curry (USD 100.4 million) leh Phoenix Suns star Kevin Durant (USD 89.1 million)-te chu he list-a basketball player kan hmuh dang pahnihte an ni.
Forbes hian infiammite sum hailuhna hi khelmual chhung leh pawn atangin an chhutsak a, an hlawh pangngai, prize money leh bonus an dawnte bakah sponsorship atang te, game an khelh atanga an sum hmuh, an hlimthla leh hming chuanna thawmhnaw bakah licensing income atanga an sum hmuhte an zirchiang a ni.
Khawvel puma infiammi hlawh hnem ber Ronaldo
