Sap saum tih chuan hre lo kan tam tawh fû ang, cheese ti ila kan hre leh deuh vek si ang! Spain-ah hetiang cheese manto zet mai hi an siam a, kg 2.3 chu euro 36,000 (Rs 36,20,340 vel)-in an hralh a, Guinness World Records-in khawvela cheese manto berah a puang.
He cheese hi Angel Diaz Herrero factory a siam niin, kumtin a cheese competition an neih thin, 52nd Certamen del Queso de Cabrales-ah an lilam a, record siam thei khawpa mantoin an hralh ta a ni. A hmaa lilamnaa cheese an hralh to ber chu 2019 ami niin, euro 20,500 (Rs 20,56,550 vel) man a ni a, chu chu Rs 16,00,000 dawnin a rawn khum ta a ni.
Kumin cheese entir siaknaa winner, cheese manto ber ni ta hi, sea level atanga metre 1,500 vela sang, Los Mazos puk-ah thla 10 chhung an um a. Bawnghnute atanga siam niin, hmun hrang hrang atanga cheese entir siaknaa an ken khawm zinga judge ten an tlang chhuak a, an lilam ta a ni.
Lilam bul tanna hi euro 3,000 niin, vawi 40 chuang an inlan zak zak a, a tawpah restaurant El Llagar de Colloto neitu Ivan Suarez-a’n a chang ta a ni. Ani hian tun kum nga chhung chu he cheese entir siaknaa winner an lilam hi a la chhang huai ber vek a ni.
Khawvela cheese manto ber
