Royal Caribbean ta, khawvela cruise ship lian ber, Star of the Seas chu a vawi khat nan Florida, US atangin a zin chhuak dawn ta a. Western Caribbean cruise-in zan sarih thangin Costa Maya, Cozumel leh Roatan, Honduras te a tlawh dawn a ni.
Lawng hi chhawng 20 niin mikhual 5,610 nei thei a ni a, thawktu mi 2,350-te nen mi 7,000 chuang an chuang thei a. Tonne 250,800-a rit niin a laizawn (sister ship), Icon of the Seas aiin a sang hret a ni.
Star of the Seas hian a chhungah aquadome lian tak neiin tuikhawthla pawh feet 55-a sang a awm a. Tuichenna pasarih, waterslide paruk, vur tlengna (ice rink), laser tag arena leh escape room a nei bawk.
A chuangte hian tui fawna tleng (surfing) pawh an ti thei dawn a, metre 12-a sei surf simulator a awm a. Restaurant leh lounge 40 awmin Chicago-a Lincoln Park Supper Club ang deuhva thuam a ni hlawm nghe nghe.
A chuan man hi a hniam ber mi pakhat tan $951 (Rs 83,554) a ni a. A chuan man hi to mah se tun laia lawnga zina chawlh hmang an pun zel avangin a chuang tur an awm theih reng a rinawm niin The Cruise Guy dintu, Stewart Chiron chuan a sawi.
“Miin lawnga zin hi tun hma zawng aiin an uar a, an uar zel dawn niin a lang bawk a. Chuang duh hi an tam em em zawk a, lawng thar a nih phei chuan a phurawm zual em em bawk a ni,” tiin Chiron-a chuan a sawi.
Chiron-a chuan khualbuka thlenna man a to ve zel avangin miin ram zau tak hmuh phaha lawnga zin mai chu an thlang uar deuh deuh nia a lan thu a sawi a. Lawnga zin phurtute pawhin mite hipna tur an duang thiam a, kalna tur tha leh tawnhriat tha tak tak an neih theihna tur an chhawp tha zel bawk tih a sawi bawk.
“Tunah hi chuan miin an duh telh telh dawn a. Mi thenkhat, lawnga vawi hnih khat lo zin tawh hian zin belh zel an duh tlat zel a ni,” a ti.
Star of the Seas hi Orlando atanga chhuakin zan zarih chhung Caribbean velah a kal kual dawn a. San Juan, St. Kitts, Cozumel leh Royal Caribbean ho thliarkar bik, Bahamas-a mi an tlawh bawk ang.
Khawvela cruise ship lian ber, Star of the Seas a zin dawn ta
