Khawvela mipa damlai zinga upa ber John Tinniswood chuan kum 112 a tling ta. John Tinniswood hi August ni 26, 1912 a piang a ni a, Southport, England-a care home-ah awmin, hetah hian a chhungkhat leh thiante nen a pianchampha pawh hi an lawm a ni.
John chuan khawvela mipa upa ber nih chuan amahah engmah danglamna a nei chuang lo niin a sawi a, “Tlang taka sawi chuan engtin vak mah min nghawng chuang lo. Engah teh vak ka ngai lo. A kum danglamna pawh ka hre chuang lo a, min tiphur deuhtu pawh a ni chuang lo. Chu chu hetiang kum ka dam thlen theihna chhan pawh hi a ni reng a. A lo thlen ang zel a awm thiam hi a ni mai,” a ti.
John chuan a damreina chhan thuruk engmah sawi tur a hre lo a, “Eng thil bik emaw tak a awm pawh ka hre lo. Ka naupan deuh laiin ka active ve hle a, kein ka kal nasa. Mahse, midang aia ka danglamna a awm chuang lo. Mite pawhin an tih ve vek tho a ni,” a ti.
Zirtawpni apiangin sangha leh chips a ei ziah tih lohah chuan John hian ei leh inah eng emaw han tihbik a nei chuang lo a, hrisel taka awm reng nana pawimaw a tih chu thil reng reng a lutuk a tih loh a ni. John hi vawiin thlengin midang tanpuina tel loin a la inenkawl thei a, a sum leh pai pawh aman a la vawng fel thlap a, khawvel chanchin tar pawh radio ngaithlain a la ngaihven reng bawk a ni.
John hi a nupui Blodwen nen kum 44 an innei a, Blodwen hian 1986 khan a thihsan a, fanu Susan an nei a, tu pali leh tuchhuan pathum a nei tawh bawk. British mipa piang tawh zinga damrei palina a ni mek a, thla 13 dang a la dam leh a nih chuan Henry Allingham record lehpelin, British mipa piang tawh zingah chhinchhiah theih china damrei ber a ni ang. Chhinchhiah theih china khawvela mipa damrei ber cu Japanese Jiroemon Kimura niin, 2013 khan kum 116 mi niin a thi.
Tuna khawvela upa ber chu Japanese Tomiko Itooka, kum 116, a ni a, ani hi hmeichhia a ni. Chhinchhiah theih china khawvel mihring piang tawh zinga damrei ber chu French Jeanne Calment (1875-1997) niin, kum 122 a dam.
Khawvela mipa upa berin kum 112 a tling
