Khawvela nuclear plant lian ber tihnun thar tithi lehnghal

Japan chuan khawvela nuclear power plant lian ber chu an tihnun thar leh hnu lawkah an tithi leh nghal tih a enkawltuin a sawi.
Tokyo hmarthlanga Kashiwazaki-Kariwa-ah hian reactor hi ‘tihnun tan dawn lai velin’ a alarm a ri nasa a; mahse, reactor dinhmun erawh ‘a tha’ tih Tokyo Electric Power Company (Tepco) thupuangtu, Takashi Kobayashi chuan a sawi.
Reactor number six hi 2011 Fukushima disaster hnua a vawi khat nan Nilainia tihnun thar leh kha a ni a; mahse, a alarm-in hna a thawk that theih loh (malfunction) avangin ni khatin an sawn hla zawk a ni.
Japan hian kum 15 kal taa lirnghing magnitude 9.0-a nain a sawm tum khan Fukushima plant hi derthawng takin a awm a, khawvela nuclear chhiatna lian ber tlingin reactor an neih 54 chu an tithi zui vek a ni.
Hetih hun lai hian plant atanga radiation put avangin a chhehvela mi 1,50,000 chuang sawn chhuah an ni a. Thuneituten a him tawh an tih hnuah pawh tun thlengin la kir lo an awm.
Ningania reactor number six tihthih leh a nih hnuah Kobayashi-a chuan ‘a dinhmun a tha a, pawn lamah radioactive-in engmah nghawng a nei lo’ niin a sawi.
Reactor hi Thawhlehnia tihnun tan tum kha a ni a, ni khata sawn hlat a ni a. Thla thar atangin sumdawnna atana hman tan leh pawh tum a ni bawk.
Kobayashi chuan Tepco-in thil thleng hi ‘a chhan an chhui nghal’ tih sawiin engtikah nge hna an thawh tantir leh theih dawn an hre lo tih a sawi.
Kashiwazaki-Kariwa reactor pasarihna pawh kum 2030-ah tihnun leh tan tuma hmalak a ni a, a dang panga erawh hluihlawn a ni vek tawh thung.
Plant hi tinung leh pawh ni se reactor pasarihten hna an thawh vek theih tawh dawn loh avangin power a siam chhuah pawh tlem sawt tura ngaih a ni.
Reactor number six hi a bul hnaia chengte chuan tihnun leh an duh lo hle a. Kar hmasa pawh khan mi tam vak lovin Tepco hmunpuiah duh lohna an lantir a, December thla khan Niigata prefectural assembly tualah mi thahnem zawkin an lo lantir tawh bawk.
Japan hi nuclear power hmang hmasa ber pawl niin kum 2011 hma zawng kha chuan an electricity hman 30% dawn siam chhuah nan an hmang a, kum 2030-ah phei chuan an mamawh 50% zet siam chhuahtir tum an ni.
Fukushima disaster avanga an tihthih leh vek hnuah an inruahman lawkna tidanglamin kum 2050-ah khuarel tichhe lo chi hmang veka siam power hman vek an tum tawh thung.
Kum 2015 atang khan Japan hian reactor hman theih 33 zinga 15 an lo tinung tawh hlawm a ni.