Khawvel mipui zahve lawih te chu hmalakna thar a awm lo a nih chuan kum 2035 ah rih dan tur aia rit an ni hman dawn tiin World Obesity Federation chuan a sawi lawk.
Mihring tluklehdingawn 4 vel chu rih dan tur aia rit ni hman dawnin a bik takin rih tur aia rit hi naupangah a nasa zual tiin report cuan a tarlang bawk a.
Rih tur aia rit tamna ber tur chu sum lakluh tlemna hmun Africa leh Asia khawmualpuiah te a nasa ber dawn an ti bawk a. Thau uchuakna avanga sum sen belh tur chu kum 2035 ah chuan $ 4 trillion (vbch nuai 4) a kai dawn an ti bawk.
He federation president Prof Louise Baur chuan report-in a tarlan chu mutmawh hnarmawha neih ngai tia sawiin ram tin ten hma an la vat lo a nih chuan a nghawng a na dawn tiin a sawi bawk.
A bik takin naupang leh thalaiah thau uchuak an pung nasa hle a, hei hi kum 2020 atang khan a let hnihin mipa leh hmeichhiaah pawh a pung niin tarlan a ni a.
Prof Baur chuan a ngaihthatthlak loh thu sawiin sorkar leh policy siamtute chuan thalai generation te thau uchuaknain an hriselna, social leh economic cost a nghawng turu lutuk tur chu ven ngai tiin eng vanga thau uchuak chu pung nge an nih a system leh a bulthut atanga chin chhuah ngai a ni, a ti bawk.
Thau uchuak chu ram changkang lo zawkah nasa zual zelin khawvel ram 10 zela pakua thau uchuak pun tamna tura ngaihte chu ram changkang lo zawk Asia leh Africa khawmualpuia mite an nih thu tarlan a ni a.
Thau uchuak punna chhan tam berah ei leh in lama fimkhur lohna vang te ni berin a bik takin processed food uar lutuk te, taksa tihchet tlem lutuk leh sorkar ang pawhia food supply leh marketing policy tha lo te, weight management leh health education lama service tha tawk lo te chu a chhan leh vanga puh zingah a tel.
Ram changkang lo zawkte chuan thau lutuk veng turin leh a nghawng na takte tinep turin theihna an nei tlem zawk zel bawk tih a ni a. Report chuan thau uchuak tam chuan global economy a nghawng ngei dawn ti bawkin global Gross Domestic Product 3% vel lai a nghawng dawn an ti bawk.
Thau uchuak tih hi medical term taksa a thau a nihna tur aia tam daih sawina a ni a. Chumi teh nan chuan body mass index (BMI) hman niin BMI chu an rihna leh san lam chu lak duna semin chawh chhuah thin a ni.
Khawvelah thau uchuak an pung nasa zual
![](https://theaizawlpost.org/wp-content/uploads/tap_logo-min-large.jpg)