Khawzawl Vengthar PWD Complex-a auditorium sak tur lungphum chu Nilaini khan Urban Development & Poverty Alleviation changtu deputy chief minister Tawnluia’n a phum.
Khawzawlin auditorium changtlung tak a nei tur chu a lawmpui thu deputy chief minister hian a sawi a. Auditorium chu khawtlang tanrualna, inunauna leh pumkhatna thlentu a nih theihna’n sak tan a nih atangin neitu thinlung pu theuh turin a chah. “Neitu thinlung put hi ram leh hnam, chhungkua leh khawtlang hmasawnna bulthut a ni,” a ti.
Tuichang bialtu MLA Tawnluia sawi danin, a bial chhungah UD&PA enkawl urban town pahnih – Khawzawl leh Khawhai bakah Biate chhiar telin an district huamchhungah urban town pathum a awm a ni.
Khawzawl damdawi in chu ‘formal notification’ hmangin District Hospital-a puan ni tawh mah se, thawktu indaihlohna phuhruk a ngai a, Health, Finance leh DP&AR department ten chak takin hma an la mek tih deputy chief minister hian a sawi bawk.
Auditorium hi UD&PA department kaltlangin state sawrkar fund, nuai 642.92 senga sak tum a ni a, chhawng thum a ni ang.
Khawzawlah auditorium sa dawn
