Kum 10 chuang kal taah khan khehpuam a lar a, a vanglai chuan a thawm a na hle. Mahse a reh telh telh a, man tur pawh a tlem telh telh niin a lang.
Khehpuam tia sawi pseudoephedrine hi 2011 velah khan a ri hluai a, damdawi chi khat niin, khawchhak lamah an tawlh thin. Hetiang lama inhmang lo tura ngaih mi thenkhat pawh an tel a, mak tih a hlawh thin. Mahse a thawm hi a na rei lo a, 2017 leh 2018 vel atang khan a zia telh telh.
Mizoram Excise & Narcotics (MEN) department-in 2011 khan kg 1014.016 an man a, 2011 hi an man tan kum a ni. Damdawi zang tak mai a ni a, kg 100 pawh a tam tham hle.
2012-ah kg 3742.022 an man a, 2013-ah kg 2268.417 an man. 2011 atanga 2013 hi a vanglai tiin a sawi theih ang. Chumi hnuah chuan a tam ta vak lo.
2014-ah kg 287.495 an man a, 2015-ah kg 109.515, 2016-ah kg 206.040, 2017-ah kg 19.137, 2018-ah kg 125 an man.
An man tlem telh telh a, 2019-a kg 90.690 an man hnuah 2020 leh 2021-ah an man ta lo. 2022-ah kg 29.530 an man leh a, a tlem ta. 2023-ah phei chuan kum tluana an man hi kg 5.943 chauh a ni tawh. 2024-ah an man lo a, kuminah an man leh. 2025-ah hian October thla thleng khan kg 7.420 an man.
Hetia khehpuam a tlem tak chhak hi chiang faka hriat a ni lo a, a mantu lamin an man that avang leh a hremna lam a khauh vang a nih rin a nih bakah, an tawlhnaah a hma anga mamawhna a san tak loh vang a nih ring an awm.
MEN department lam chuan khawchhak lamah pseudoephedrine mamawhna a sang tawh lo a ni thei ang an ti a, tun hnaiah meth chhuak thar crystal meth tia sawi a chhuak a, crystal meth siam nan hian pseudoephedrine an mamawh lo nia a lan thu an sawi. Pseudoephedrine hi ruihhlo chi khat methamphetamin, meth tia sawi siam nan an hmang nia hriat a ni a, meth chi khat crystal meth siam nan hian an hmang lo nia ngaih a ni.
Pseudoephedrine rual hian Mizoramah methamphetamin hming a ri nghal a, meth hi man tur a awm ve deuh reng. Kuminah October thla thleng khan kg 259.066 an man tawh a, 2023 khan kum tluanin kg 99.506, 2024-ah kg 140.839 an man. 2023 leh 2024-ah aiin kuminah an man hnem tawh zawk.
Khehpuam a thep telh telh
