Engemaw lai khan khehpuam tawlh a hluar a, khawchhak lamah damchawi chi khat pseudo-ephedrine an thawn thin. Hausak pui fe fe pawh an awm nia ngaih a ni a, ‘khehpuam’ tia sawi thin a ni. He thil hi a nasa ta lo niin a lang a, a thawm pawh hriat tur a awm ta lo hle.
Kum liam ta 2023-ah khan Mizoram Excise & Narcotics (MEN) department-in tih tham an man lo a, kuminah an la man lo bawk.
MEN department chhinchhiahna enin, 2011 atanga 2013 thleng khan khehpuam hi an man nasa a, 2014 atangin an man tlem.
2019-ah khan tlem azawng an man a, 2020 leh 2021-ah chuan an man lo. 2022-ah kg 29.530 an man leh a, 2023-ah kg 5.943 an man. Kuminah March thla thleng khan an la man lo.
MEN department hotute chuan khehpuam hi a zia tawh thu leh man tur a awm meuh tawh loh thu an sawi a, an thawn thinna khawchhak lamah pseudo-ephedrine mamawhna a awm ta lo emaw, an khawl ngah rih emaw a nih a rinawm thu an sawi.
Pseudo-ephedrine hi a tawlhte hian Myanmar-ah an thawn thin a, thenkhat chuan Myanmar atang hian ram dangah an keng leh niin an sawi. Myanmar atangin ram dangah an keng leh em tih hi chu hriat chian a ni lo.
MEN department lam chuan pseudo-ephedrine hi meth siam nana hman a nih chuan, meth chhuak tharah an hmang tawh lo a ni ang tih ngaihdan te pawh a awm thu an sawi a, mahse a hmuna han kala finfiah an nih loh avangin huai taka sawi theih chu a ni lo an ti.
Myanmar lam an buai avangin a hma angin pseudo-ephedrine an lalut thei lo a ni ang tih ngaihdan pawh a awm.
Pseudo-ephedrine man zat
2011-ah Kg 1014.016
2012-ah Kg 3742.022
2013-ah Kg 2268.417
2014-ah Kg 287.495
2015-ah Kg 109.515
2016-ah Kg 206.040
2017-ah Kg 19.137
2018-ah Kg 125
2019-ah Kg 90.690
2020-ah –
2021-ah –
2022-1h Kg 29.530
2023-ah Kg 5.943
2024 (Jan-Mar)-ah –