Kum 10 chuang kal taah khan Mizoramin khehpuam a hmelhriat thut a, a vanglai chuan a thawm a ring hle. Mahse a thawm hi a reh telh telh a, tun hnaiah phei chuan thawm a nei lo tih tur khawp a nih chang te pawh a awm.
Khehpuam tih hi damdawi chi khat ‘pseudoephedrine’ tawlh sawina a ni a, hausa thut sawi nan te pawh hman a ni. Tun hnaiah pseudoephedrine tawlh thawm hriat tur a tlem ta a, a mantu lam pawhin an man tlem telh telh.
CID (Crime Branch) te chhinchhiahna enin 2024-ah khan pseudoephedrine an man lo a, kuminah pawh March ni 20 thleng kha chuan an la man lo. 2018, 2019 leh 2021-ah khan an lo man lo tawh bawk.
Excise & Narcotics department pawhin nikum khan an man lo a, 2020 leh 2021-ahte an man lo tawh bawk. 2023-ah an man a, mahse tam tham a ni lo, kg 5.943 an man. 2022-a an man pawh a tam lo a, kg 29.530 an man.
Excise & Narcotics department hian 2011-ah pseudoephedrine hi an man tan a, 2019 thleng khan kum tin an man. Chumi hnuah chuan an tlem a, man loh kum te pawh a awm ta fo.
Police leh excise & narcotics department hotute chuan pseudoephedrine tawlh hi a nasa tawh lo tih te, a reh telh telh bakah a hma anga nasa taka buaipui kha an awm tawh lo nia a lan thute an sawi. Khawchhak lamah a hma angin an lo mamawh tawh lo nia a lan thu an sawi a, a a hralhna tur hi a vang tawh nia hriat a nih thu te an sawi.
Khehpuam thawm reh telh telh
