FC Porto khelmuala zin-chhuak Barcelona chuan chawlh-lawk dawna Ferran Torres-a goal thun hmangin Portugal ramah point thum an hlawhchhuak leh a, Champions League Group H table-ah khelh hniha point ruk hum chungin hma an hruai chhunzawm.
First half hun pekbelh minute khatna a kal mek laia Torres-a goal tur siamsaktu kha Ilkay Gundogan niin, Germany midfielder Gun-dagon ang bawka Manchester City player hlui Torres tan tun kha season kal lai Champions League-a a goal khatna a ni nghal.
Minute 34-a khelmual lut substitute forward Torres khan first half laihawlah inhliam Robert Lewandowski a thlak a, chawlh-lawk hma chiahin Gundogan-a pass chu dive pahin goal-ah a chantir a, mikhual chakna goal hlu tak a thun.
Second half-ah mualneitu Porto lamin an siphurh sut tumin tan an khawh na viau a, mahse, an hlawhtling zo lo a, minute 93-ah yellow card vawihnih hmuh vangin Barcelona player Gavi hnawhchhuah ni mah se Catalan team hian a tlem zawk an nihna an tuar hman lo hlauh.
Barca chakna atana player pawimawh chu an goalkeeper Marc-André ter Stegen niin, Wendell-a goal tur a dansak bakah kual ngawka Galeno chhuih a dansak bawk.
He inkhelah hian Barcelona rawlthar Lamine Yamal pawh a langsar leh a, history dang siambelh lehin, kum 16 leh ni 83 mi niin Porto a hmachhawn a, Champions League game bika starting liine up luah thei naupangber a ni.
FC Porto tan Mehdi Taremi pawhin goal a khung ngei a, mahse, a hnuah he goal hi offside vangin hnawksak a ni a, an kawtkaiah Portuguese club-in point an thawkchhuak zo lo.
Porto hian goal khung zo lo mah se khel tha zawk an ni a, first half chhungin Mehdi Taremi, Stephen Eustaquio leh forward Pepe-te’n goal khung theihna hun remchang an bawhpelh vek.
Second half tir lamah Barca defender Jules Kounde chuan an lama goal lut tur pui takin a dang bawk.
Nilaini Champions League Group H inkhel dangah Shakhtar Donetsk pawhin 3-2-in mualneitu Royal Antwerp an hneh ve bawk.
Ti hian, an group table-ah Porto hian point thum neiin pahnihna an luah a; point thum ve bawk hum chungin Shakhtar-in an dawt a; a mawngphahah point la nei ve lo Antwerp an thu.
Borussia Dortmund 0-0
AC Milan
Group F lamah Nilaini vek khan an kawtkaiah Dortmund an chak zo lo a, Signal Iduna Park-ah point khat ve ve hmuin team pahnih an inthathen.
He result hi an group-a Mi-lan-in draw vawihnih an hlawh-chhuahna niin, Newcastle United lakah goal thun zo loin an lo inhnehtawk tawh bawk a ni.
An bultanna inkhela sihnih faia Paris St Germain laka tlawm Dortmund tan erawh tun kha season kal lai Champions League-a point an hmuh vawi-khatna a ni thung.
Group F inkhel dangah New-castle chuan 4-1-in an mikhual PSG an hneh a, khelh hniha point li nei chungin Magpies-in an group-ah hma an hruai a; pahnihnaah Paris club awmin, point hnih nen pathumnaah Milan an thu a, Dortmund chu a mawngphah luahtu an ni.
AC Milan hi season liamta semi-final khelh hnihah khan Inter Milan lakah an chak zo lo ve ve a, season thara an match hnih khelh tawhah goal khung zo lo lehin, ti hian, an match hnuhnung paliah Champions League goal an khung zo lo fai vek a, Milan manager Stefano Pioli a lawm lo hle.
Celtic 1-2 Lazio
Nilaini Champions League Group E match pakhat zawkah hun pekbelha Pedro goal tauhluh hmangin Italian club-in away hnehna an chang.
Scottish champion Celtic hian tan atanga minute 12-na lekah goal hmahruai sualchhuak-in, Japanese striker Kyogo Furuhashi chuan box chhungah Matt O’Riley ball pek dawngin goal-ah dan rual lohin a thawnlut.
Serie A club hian na takin an nawrlet a, minute 29 an khelh tlin rualin Matias Vecino chuan Lazio siphurh a sut a; Celtic hian second half-ah hmahruai nawn theihna hun remchang hmuin, Luis Palma chuan minute 10 la awmah goal a khung a, mahse, VAR endik a nih hnuin offside-a ham a ni.
Hun pekbelh minute rukna a kal mek laiin Mattia Zaccagni thlaktu Pedro chuan Matteo Guendouzi siamsak atangin chakna goal a tauhlut a, Scotland ramah Lazio-in point thum an hlawhchhuak.
Khelh hniha vawihnih chak Barca
