Kho Kho World Cup
India ram chhung chauha khelh thin infiamna chi khat Kho Kho chuan khawvelah hak a zauh zel a, nakkum January ni 13-19 chhung hian a vawikhatna atan he game World Cup hmasaber chu New Delhi-ah nghah a ni dawn tih tournament organiser-te’n an nemnghet.
India hian kum 2036 summer Olympic Games thlen ve tumin kawng a dap mek a, India prime minister Narendra Modi hoin he mi chungchang hi khawvel hriatah sawichhuah a ni fo tawh a; India beiseina hi a hlawhtlin mai pawh a rinawm a, chuti a nih chuan Games thlengtu ramin medal an lak theihna tura an thiam zawng infiamna bilh luh tur zingah Kho Kho hi a tel rin a ni a, chu mi atan chuan kawng an lo sial tan ni tura ngaih a ni.
Thyagraj Stadium-a khelh tur Kho-kho World Cup 2025-ah hian mipa leh hmeichhe team 24 inel tura ruahman niin, tun dinhmunah khawi ram ram nge chhuak dawn hriat mai theih a ni rih lo.
Kho Kho Federation of India (KKFI) president Sudhanshu Mittal chuan, “Kho Kho hi he ram tualchar chirhdiak nena inzawm niin, awngphah (mat) chunga kan senglut tur hi kan inchhuang takzet a, international sport ni tura thawkrim em em federation chungah ka lawm takzet a ni.
“A tirah chuan Ultimate Kho Kho League hi fans tana chhawpchhuak mai chauh kan ni a, tunah erawh hma kan sawn a, Kho Kho World Cup hmasaber hial kan sualchhuak dawn ta a ni,” a ti.
Kho Kho World Cup
