Khualbuk bawlhhlawh thehthang
dan atangin tehna hrang siamsak
District Level Committee on Swachhata Green Leaf Rating leh District Water & Sanitation Committee Lunglei chu an chairman, bawrhsap Navneet Mann hoin Thawhtanni khan an thukhawm a. Thli leh bawlhhlawh sawngbawl leh thehthang kawnga an district-a khualbuk (hotel/ homestay/ sawrkar enkawl riahbuk) thliarhran (rating) dan leh World Toilet Day campaign an sawiho.
Sawrkar laipui Ministry of Jal Shakti hnuaia Department of Drinking Water & Sanitation leh Ministry of Tourism tangdun chuan India rama khualbukten thianghlimna leh hriselna kawnga hma an sawn theihnan an chet thianghlim dan azira thliarhran, Swachhata Green Leaf Rating (SGLR) kalpui turin a ruahman a. Lunglei district-a khualbukte chu sub-divisional officer (Sadar) kaihhruaiin Verification Sub-Committee chuan kumin October 8-14 chhung khan a hmunah an endik.
An district chhunga khualbuk 13 endik niin, inthiarna thli (faecal sludge), bawlhhlawh sakhat (solid waste) leh tuichhia (grey water) an sawngbawl leh thehthang dan azirin mark leh rating pek an ni a. Rating hi chi thum – (a hniam lam atangin) 1 Leaf, 3 Leaf leh 5 Leaf awmin; Lunglei district-a khualbuk pali – Circuit House Lunglei, Tourist Lodge Zotlang, Hotel Malawm leh Ono Hotel chu 3 Leaf rating pek niin, khualbuk pahnih – Elite Hotel leh Hotel Albasta chu 1 Leaf rating pek an ni.
Verification Sub Committee-in rating a pek hi tun tuma thukhawm hian pawmpuiin, rating hmusaten rating sang zawk an hmuh theihnan leh rating la hmu pha loten an hmuh ve theihnan theihtawpa hma lak zui an rel a ni.
November 19 – World Toilet Day denchhena mipuiin inthiarna in tha leh thianghlim an ngaihpawimawh zel theihnana inzirtirna beihpui thlak kalpui mek pawh sawiho a ni a. He campaign hi November 19 atanga December 10 chhung kalpui tur niin, mimal leh vantlang inthiarna thawmthat leh cheibawl hna thawhnan, ek in him tha pawimawhna uar zawka inzirtirna atan ruahman a ni.
Thingtlanga vantlang inthiarna hmun 21 tan inelna buatsaih tum niin, RD block tin atangin a tha pahnih theuh thlang hmasa in, chumi atang chuan Lunglei district-a a tha ber pathum thlan chhuah leh tum a ni.
Khualbuk bawlhhlawh thehthang dan atangin tehna hrang siamsak
