Kawng hrang hranga khualzin chhawntute leh lo buaipuitu – tourist service providers hriat tur pawimawh inhrilhin Thawhtanni atang khan Aizawlah training tan a ni a, Nilaini thleng a awh ang.
Training hawngtu Tourism minister Lalrinpuii chuan kan ram sum dehchhuahna pawimawh tak tourism lamah hmasawnna awm theihna’n mipui tel tamna, community based tourism a pawimawh tih a sawi a. State dang leh ram dang (foreign) atanga rawn kal mai bakah tualchhung mi a huam tel a, chu’ng chu tih hmasawn a tul tih a sawi.
Department chu a kawng sialtu chauh an ni a, a lo chhawntu leh buaipuitu tak ho chu an pawimawh, tiin, “Kan ram tourism hmasawnna atana pawimawh tak pakhat chu marketing a ni a, website leh social media hman tangkai a pawimawh. Mizoram tourism hi mi zawng zawng, thingtlangmite tan pawha tel theihna tur, huapzo tourism-a siam theih ka beisei thu a. Chumi tih hlawhtlinna atan chuan awmna tur (accommodation) tha leh man man si, eitur thianghlim leh tuihnai, eiturah Mizo thilsiam (local food) tih lar leh mi dawnsawn thiam (hospitality) te a pawimawh a ni,” Lalrinpuii hian a ti.
Mizoram sawrkar chuan Allocation of Business a tih chhuahah, tourist service providers – travel agents, tour operators, accommodation units, catering units leh restaurants, spa leh resort chu Tourism department hnuaia dahin, department inkaihhruaina, Mizoram Registration of Tourist Trade Act 2020 chu duan a ni.
Hemi hnuaiah hian tourist service provider ho hi inziaklut vek tura duan niin, tun thlengin hotel 60, homestay 97, guest house /inns/ lodge/ motels adt. 20, travel agents 35, tour operators 11, catering units 29 leh restaurants 700 chuang an inziaklut tawh.
Training hawnna hi Mizoram University Tourism & Hospitality Management department, Mizoram Restaurant Owners Association, Mizoram Hotel Owners Association, Mizorama homestay leh guest house, inns, lodge neitute, Travel Agents Association of Mizoram, All Tour Operators of Mizoram leh Mizoram Tour Guide Association hruaituten an chhim a ni.
Khualzin nena inhne hnai ho hriat tur pawimawh hrilh
