JC.Zoremi Hmar Joute
Mizo ten kût pui leh intihhlimna chi hrang hrang kan neih zingah Khuangchawi hi a lar ber pawl a ni awm e. Eng vanga October thla hi khuangchawi thlaa vuah nge kan nih tih te, khuang an chawi dan tlem azawng i’n sawi dawn teh ang.
Khuangchawi hi Thangchhuah nihna a ni a. Mizo zingah chuan ngaih ropui em em a ni. Sechal pahnih leh Sepui talh tur a ni a, vawkpa pahnih a tel bawk tur a ni.
Hemi hma thla thum velah khan “Sathingzar” an ti a, khaw khat nula leh tlangval zawng zawngin thing an ek a, thing hring a ni tlangpui. Kawtchhuah lûn lai berah khan kawngsirah hrui an thlung a, tah chuan an tung thút a, fing hnih fing thuma sei te pawin an zar thin. Hemi ni hian “Kelkhawthang” an ti a, Kel chal hmul sei tak an talh a, chu chu naupangin an chaih a, nuam an ti hle thin. He sathingzar hi se talh huna an sa chhumna tur a ni a, nula leh tlangval tan hun nuam tak a ni bawk.
A tihpui hun chu October thlà hi a ni thin a, thil ropui ber a nih avangin kum khat chhunga hun nuam lai berah an ti thin a, chu vang chuan October hi chu kan Mizo thla chhiarah pawh ‘Khuangchawi thlà’ tih a lo ni ta a ni.
An ran talh tur kha a tam avangin fatu tur pawh tam tak an awm a ngai a. Sial pathum talh tur a nih avangin Seluphan pathum suih tur a ni a, pakhat suih tur pawhin mi sawm(10) aia tam mah a duh si; Zu pawh ngan za(100) emaw vel an sa thin a, chuti pawhin a daih thei lo hle. Khuang hlâng phan tur khan mi tam fe a ngai bawk si, hemi ni hi chu a buaithlak ngei mai; mahse chutia buai mur mur chu ropuina a ni a, nuam an tih chhan ber pawh a ni lawi a!
A rei lam thu-ah chuan ni li, In chhe siam ni, Zu pui ni, Zu thing ni, Saruhkawl cheuh ni, Chawndo ni tih kha a la ni ta zel tho a, Vawkpa khan Sa a bia a, Sial khan khua a bia tih a ni zel bawk.
Khuang hlâng tur chuan Phulraw tlawn, hlam thum/hlam li-a sei an va pu a, chu chu an tawn kawkalh ta a, a chungah chuan vawn fung tur, a kualin an siam a, tah chuan an tu leh fate zawng zawng an chuang a, fatuho khan mualah an chawi kang a, an lam a, chu chu ‘khuangchawi’ an tih ber chu a ni. A chunga chuangte khan eng eng emaw, tangka te, Darbel te, Sial te, Kel te, Silai te pawh an vawr a, mipuiin an inchuh huai huai mai a, hei pawh hi a ropuina tho niin, nuam an tih chhan a ni ve bawk.
Silai te, Sial te an vawrh dawn tih an hriat chuan tlangval awmkhauh khauh te kha an intiam rual a, palian deuh deuh te kha an tang rual bawk a, chan ngei tumin an inchuh thin a, en nawm tak a ni; a khawttlangin an en thup mai thin a, a ropui thin hle a ni. “Sial vawrh,” tih chu ‘se hrui’ an ti a, hruizen lian tawk, pawh chah rual loh, hlam chen vela sei kha an vawrh a, chumi changtu chuan Sial an nei mai thin a ni.
Silai pawh kha a tak ni lovin a lem, thingfak suih mum emaw kha an han vawrh a, chumi chang chuan Silai chu a nei mai a ni. A ropui khawp mai. Ruai theh Chawngchen leh Sumdeng Zu in te kha a lo ni leh bawk a, a khaw buaiin an buai mur mur mai thin a, chu chu a ropuina leh bawk a ni. Tin, Khuang chawi nu leh pa khan puan an tiàl thei tawh a, an inah khan bahzar an siam thei bawk a, thangchhuah nu leh pa an ni ta; mitthi khaw lamah pawh faisaa chawm tur an ni an ti.
Tin, October thla hi favang awllen lai, “Chhawrthlapui,” ti-a kan koh duat, Thlà pawh a en ber thla a ni a, lungleng mi tan chuan thla eng lawma lung chhe teuh chunga zai tin an vawr hun, nuam hrehawm an chen hun lai a ni a, thu leh hlaah pawh kan phuah chhan nasa na ngiang e. Thlà khi hmeichhia angah kan lo ngai deuh vek ni tur a ni, ‘Zan lalnu’ te kan ti bawk a ni lo’m ni khahh?!
Boruak lah a nawm ber lai, lum lo vawt chuang si lo hun lai a ni a, nunhlui leh rual hlui ngaia ka kùr hun chu tun ang hun, lunglenna ka buan hneh loh hun chu vangpui hun nuam hi a ni mai e!