National Bank for Agriculture and Rural Development (NABARD) sum cheng nuai 15 senga Northeast Initiative Development Agency (NEIDA) kaltlanga sak, thlai thar chhuah, sa leh kutthemthiamna hmanga thil dehchhuah zawrhna tur – Khuangleng Rural Haat chu Thawhlehni khan Champhai district bawrhsap James Lalrinchhana’n a hawng.
Rural Haat sak nan hian tunhmaa bazar awmsa chu tih len niin, a chung sak belha tihchangtlun a ni a. June 2023 atanga sak tan niin kumin March 28 khan zawh a ni. NABARD sum nuai 15 bakah hian implementing agency NEIDA-in Rs 75000 an tum a. VC lamin a hmunhma ngaihtuahin tha leh zung an thawh bawk.
Zopa chhiara chhawng hnih a ni a, a chung leh hnuaiah store room leh inthiarna dah a ni. Bazar thutna seat 24, a hnuai leh chungah 12 ve ve a awm a, tui dahkhawlna litre 2000 dawng dah tel a ni.
Khuangleng khuaah hian tunah in 428 vel awmin mi 2300 vel an cheng a. Thlai an thar nasa a, bazar tha leh mumal taka kalpui an neih loh avangin NABARD kaltlangin Rural Haat hi din a ni. A enkawl zui hi Rural Haat Management Committee kutah a awm ang.
Khuanglengah Rural Haat
