Khuarel chhiatna tawk, Nepal-a power thawnna tur pawm

Khuarel chhiatna tawk, Nepal-a power thawnna tur pawm
Tun hnaia khuarel chhiatna lian tak tawk, Nepal hnenah India chuan December 31 thleng ni tin darkar 18 power a thawn chhuak thin dawn.
Himalaya tlangdunga ram hnena power thawn chhuahna tur pawm a nih thu hi an thenawm rama power ministry chuan Thawhtanni khan a puang a. Thla tira sabereka khuangkaih avanga chhiatna thlengah khan an power siam chhuah theihna hmun 10-a thena hmun khat chuang a chhia a ni.
An chhak tlanga vur khawn chimin dil a delh atanga vur tui lian nasa tak thlengah Nepal leh Tibet-ah mi 1,400 dawn thi awm tawhin Nepal-a hydropower plant 12 chuang a chhia.
Tun thlengin chin hriat lohva awm mi 5,300 chuang zinga 900 chuang chu power station-a thawkte an la ni bawk.
Indian power ministry hian a thenawm ram hnenah hian megawatt 654 a thawn dawn tih thuchhuah a siamah a tar lang a, January-a thawn zat tur leh a la ngai em tih hi ​December-ah ennawn a nih tur thu a tar lang bawk.
“Thawn chhuah tur pawm a nih tak avang hian an hun harsa kara Nepal-in power a mamawh a phuhru thei ang a, India leh Nepalinkara energy-a thawh dunna nghet leh tha a awm chu a tichak lehzual dawn a ni,” an ti.
Nepal-a electricity atana an hman ber, tui chakna hmanga siam, hydropower hi an ramin an ngah hle thin a, tun hnaiah phei chuan ram danga an thawn chhuah zing pung chak ber a ni.
An hydropower siam chhuahna hmunpui ber, Bagmati province chu sabereka khuangkaih khan a nuai a, ram danga power an thawn chhuah titawpin India ​atangin thla eng emaw zat chhung tual chhunga an mamawh phuhruk nan an lei dawn tih an sawi.
Nepali thuneitute chuan kar hmasa khan ram hausa zawk leh khawvel huap agency-te chu suma tanpui turin an ngen a, chhiatna a thlen hnua an intun din leh nan $ tluklehdingawn 5 ​an mamawh niin an insawi.