Khuh damdawi leh a behbawm

Kar kalta Inrinni khan END Mamit chuan, dan phal loha zawrh khuh damdawi COFF-TREX bur 100 chu mi pakhat kut atangin an man a, khuh damdawi kawltu hi Narcotics Drugs & Psychotropic Substances Act,1985 dan hnuaiah thubuai siamsak-in case register a ni a.
Dan hnuaiah thubuai siamsak a ni, tih hi kan tawpna a ni deuh tlangpui. Khuh damdawi kawltu hian khuh damdawi hi khawi atanga a neih nge tih hi chhui zui ni se chuan, dan lova khuh damdawi lo hralhtu pawh thubuai siamsak ngai tur a nih hmel. Mahse, chu lam chuan chhui zui a hlawh lo tlangpui. Nge, chhuizui a ni a, dan bawhchhe theuh theuh, thubuai siamsak leh siamsak loh kan awm ta zeng zung mai tihna em ni dawn?
Tunhma atang tawhin khuh damdawi chi hrang hrang hi man a lo ni tawh thin a, man a nih chuan controlled subsatances a ni tihna a ni mai a. Daktawr lehkha tel lova tam tham tak lehnghal, lo pekchhuah kha chu thil dik lo, dan kalh, hrem theih a ni tihna a ni. Khuh damdawi man a nih hian, ‘chumi damdawi dawr atanga a lei chu’ tih lam hriat tur a awm tam lo hle a. Hei vang hi a nih a rinawm a, dan lova khuh damdawi hralh chhuah a awm leh thin hi.
Kum 2023-ah khan, damdawi dawrah CCTV dah vek tur tih thupek chu district hrang hrang DC ten an chhuah a, hei hi dan lova damdawi hralh chhuah venna tur a ni pakhat awm e. Damdawi pekchhuah leh damdawi lehkha a lan theihna hmunah CCTV hi dah tur a nih hmel a. Hei hi damdawi dawrte hian an zawm em tih endik ni tak maw?
Ruihhlo te pawh hi, a kawltu (a neitu nia inchhal) te hi an hmel atang chuan ruihhlo cheng vaibelchhe tel man han buaipui thei tur awm hmel an pu lo thin a, a neitu dik tak an nih hi a rinawm loh thin hle a ni. Hengte pawh hi, han chhui han chhui a, han indawp deuh chuan, ‘a neitu dik tak zawk chu chumi khami chu a lo ni reng alawm maw le’ tih tur hi an awm zutin a rinawm tlat a ni.
Ruihhloa sumdawnna phena inphum rute hi tun hnuah chuan man chhuah an ni ta nawlh nawlh reng a; rin loh deuh deuh an ni ta fo mai. Khuh damdawi lengvak tam lutuk pawh hi, tun aia ngawrh lehzuala ‘a zung nena phawi tel’ tuma tanlak a pawimawh dawn hle a. Dik lo taka lo pechhuaktute hming hian chanchinthar han luah ve zak zak se, a ziaawm ve maiin a rinawm.