Russia leh North Korea leader te chu Siberiaan rocket launch facility ah inhmuhna neiin hetah hian thil pawimawh sawi dunna an nei zui nghal ang a. Ram pahnih hruaitute hian United States laka nawrna nasa tak an tawh karah hmalak dan tur an sawi dun dawna ngaih a ni.
Ram pahnih hruaitute hian Soyuz-2 space rocket launch facility fang dunin hetah hian North Korean leader Kim Jong-un chuan Russian space officials te chu rocket chungchang zawhna a pe nual tia sawi a ni.
Kim leh Putin te inhmuh hma lawk darkar hnihah North Korea chuan ballistic missile pahnih tuipuiah a kapchhuak a, tihian North Korea chuan kum 2022 atang khan khawthlang ram amah hrektute a la runluih chhunzawm ta char char a. Putin an Ukraine indona a kalpui mek avanga buaina chu remchangah Kim chuan hmangin chak zawkin ralthuam siam a kalpui zel tia sawi a ni bawk.
South Korea Joint Chiefs of Staff chuan North Korean missile thlawh thui lam a sawi mai lo va. Mahse, Japan Coast Guard te chuan missile te hian a tum ram an thleng tawhah ngaiin mahse lawng te chu missile kehthem tla thei laka la fimkhur turin a chah thung.
Putin leh Kim tena Russia a domestic satellite launch facility pawimawh ber Vostochny Cosmodrome a inhmuhna an nei hian Kim chuan satellite siam an tumna kal zelah Russian technical assistance an beiseizia a tarlanga ngaih niin tun hnaiah North Korea chuan military spy satellite a kahchhuah te a tlawlh rih zel a ni.
Official photo atanga a landan chuan Kim chuan Pak Thae Song, chairman of North Korea’s space science and technology committee bakah naby Adm. Kim Myong Sik, North Korea-in spy satellite leh nuclear-capable ballistic missile submarine a neih theih nana mi pawimawh bera ngaih te chu a hruai tel tiin South Korea a Unification Ministry chuan a tarlang bawk.
Russia-in North Korea in satellite a n eih theih nan a pui dawn em tia zawhna chu, “Chuvanga inhmu chu kan ni a lawm. DPRK leader hian rocket technology neih a duh a. Space lamah pawh hmalak an duh a ni,” tiin Putin chuan a chhan thu Russian state media-te chuan an tarlang a. DPRK tih hi Korean formal name Democratic People’s Republic of Korea lamtawi niin, Putin chuan, “Issue hrang hrang te hmanhmawh hauh lovin kan sawi dun ang a, hun a awm a lawm,” tiin a sawi.
Kim Jong-Un hian Russia a tlawhnaah hian special armoured train a keng a, a chuanna tur limousine te pawh keng tel thlapin Putin nen an inhmuh veleh 40 second vel kut thingin an inchibai a. Putin chuan ‘ka hmu che ka lawm a ni’ tia sawiin Kim thung chuan Putin chu ‘buai tak chunga’ a lo hmuah avangin lawmthu a hrilh thung.
Ram pahnih hruaitute hi cosmodrome an fan hnuah inhmu zui nghalin Russian State Media te chuan Putin chuan Kim hnenah hian thla 18 indona an kalpui tawh avanga ammunition store ruak tawh chu hnawhkhat turin a ngen dawn tia sawi a ni a. North Korea hian artillery shell leh rocket te Soviet hun lai design maktaduai tel a la kawl a, chungte chu Russian army tana pawimawh tak tur a ni tiin analysts te chuan an sawi.
Kim hian Jo Chun Ryong, ruling party official in charge of munitions policy chu a hruai tel bawk a, Jo Chun Ryong hi artillery shell leh missile siamna lama pawimawh tak tia sawi a ni.
Kim pawhin kum li hnua Russia a tlawh lehna chhan chu Moscow nena an inlaichinna a ngaih pawimawh em vang tiin a sawi tiin North Korea official news agency chuan a tarlang bawk a.
Kim hian Russia hnen atangin economic aid bakah military technology a ngiat dawn tia sawi a ni a. Deputy Foreign Minister Andrei Rudenko chuan Russia chuan North Korean delegation te nena humanitarian aid chungchang an sawiho ang tiin a sawi bawk.
Russia leh North Korea-in ralthuam lama thawh dunna arms deal an siam a nih chuan khawvelin UN kaltlanga North Korea a hrekna bawhchhiatna a ni dawn thung a.
Lim Soo-suk, South Korea Foreign Ministry thupuangtu chuan Seoul chuan Kim a tlawhna thlirkir zui reng chungin Moscow nena inbiakpawhna a nei reng tiin a sawi bawk a.
“UN member state tumahin Security Councfil in North Korea a hrekna a bawhchhe tur a ni lo. North Korea nena military cooperation neiha International community te kara remna leh muanna tichhe thei zawngin chet a la tur a ni lo,” tiin Lim chuan a sawi.
A hma in United States chuan North Korea chu Russia hnena ralthuam peah a lo puh tawh a, hei bakah hian Russian mercenary group Wagner te pawh artillery shell peah a puh bawk a. Mahse, Russian leh North Korean officials te chuan he puhna hi an pha ve ve thung a ni.
Kim leh Putin ten Siberia-ah inbiakna nei
