Kohhran leh ruihhlo

Mizoram sawrkar, Mizoram Synod leh tlawmngai pawl tang ho buatsaih ruihhlo ngaite enkawlna, Hulhliap Short Stay Centre, Neihbawih Sihphir chu tunkar Thawhtanni atang khan hman tan niin, batch hmasa ber atan mi 150 chuang lak phawt a ni a.
Hetianga sawrkar, kohhran leh tlawmngai pawlte tan hona hnuaia ruihhlo ngaite enkawlna hmun changtlung leh felfai taka buatsaih theih a ni hi a lawmawm hle a. Hei hian thil dangah pawh rah tha tak a chhuah chhoh zel a rinawm.
Kan hriat angin Mizoram chhungah kohhran hrang hrang thahnem tak an awm a, an hna pui ber chu ‘chanchin tha hril’ a ni.
Chanchin tha hril hna thawk turin ram chhung leh ram pawnah missionary tam tak an tir chhuak a, chuta tan chuan sum leh pai tam tak senso a ni thin bawk. Heng sum leh paite hi kohhran mipuiin an thawh khawm a ni a, chu thawhlawm chu Pathian ram zau zelna atana kawng hrang hranga hman chhuah leh thin a ni.
Tun kan dinhmun han en hian, Mizoram hi ruihhlo leh ruihhlo ngaite avangin kan buai ta hle a, hei hi a tua te pawhin mutmawh hnar mawha kan vei tlan a hun takzet tawh a. Ram hla tak takah missionary kan tirhchhuah laiin, a tirchhuaktute ram chhung ngeiah taksa leh thlarau boral mai tur ruihhlo ngai an vei suau suau si a nih chuan, chu chuan ram danga chanchin tha hrilna turah khawlhkham te pawh a siam thei zawk hialin a rinawm a. Chuvangin, keimahni lam hi kan inenfiah a, tha lo leh dik lo lai kan siam that hmasak phawt hi a pawimawh hle a ni.
Heti tak maia thalaite zingah ruihhlo buaipui an tam chho ta mai hi, a eng lai ber hi nge kan tih dik loh tih lam hi zawn chhuah a pawimawh hle. Pathian thu kan buaipui dan te, inkhawm kan uar dan te, tawngtai leh inpawlhona kan kalpui dan te han en hi chuan, engtin nge heti taka ruihhlo ngai an tam theih tih mai awl tak a ni.
Tuna Hulhliap ang din leh ringawt hi chu, a pawimawh lo tihna ni lovin, a lera thuai ang a ni tawh a, Hulhliapa luh ngai an awm lohna tura a ‘grassroot level’ atanga ‘demand reduction’ lama tan kan lak thar leh a ngai hle a, chuta tan chuan Kohhran hian mawhphurhna sang tak an nei, tiin a sawi theih ang.