Siaha district-a kohhran lian pahnih – Evangelical Church of Maraland (ECM) leh Congregational Church of India Maraland (CCIM) chu kum 30 chuang a hranga an awm hnu ah tunhnai khan kohhran pakhatah an inchhung khawm.
1907 September 26 khan Sap missionary Rev. Reginald Arthur Lorrain te nupa chuan Mara ram an thleng a, Chanchintha pulutin kohhran – Independent Church of Maraland an din a. Chu kohhran chu a thanglian zel a, kum 1989 ah New Siaha Kohhrana Assembly neihah Kohhran headquarters leh a hming chungchangah thu inhmuhthiam lohna a awm avangin ICM atangin Evangelical Church of Maraland (ECM) leh Congregational Church of India Maraland (CCIM) tih hmingpu in an inthen ta a ni.
Hemi hnu hian inpumkhat leh turin theihtawp chhuah thin mah se, a hlawhthling thei lo a. Kum 30 chuang an inthen hnuin, kohhran hruaitute rilruah inpumkhat tura hma lak duhna a lian hle a, kum 2020 ECM Assembly chuan inrem lehna kawng zawh tura rawtna pawmin, member 7 awmna Re-Unification Committee a din a ni. Heta tang hian hma lak chhoh zel a ni a, kum 2022 ECM leh CCI(M) Assembly chuan kohhran inpumkhat turin Re-Unification Committee hmalakna an pawm ve ve a, inpumkhatna tluantling a awm theih nana bawhzui tura ruat bik Committee – Re-Unification Implementing Committee (RIC) member 16 ve ve telna, an vaia member 32 awmna din a ni.
RIC hmalaknain kumin May 24-26 chhung khan New Siaha ECM Kohhran biak inah ECM & CCIM Joint Special Assembly neih a ni a. May 24 zan inkhawmah inpumkhatna thuthlung ziah niin, ‘Pa leh Fapa leh Thlarau thianghlim hmingin’ an inpumkhat ta tih puan a ni. Hriatpuitu atan kohhran hrang hrang palai (Presbyterian Church of India, Baptist Church of Mizoram, Maraland Evagelical Church, Lairam Isua Krista Baptist Kohhran leh IKK Bualpui ‘Ng’) aiawh bakah chief judicial magistrate (CJM) Siaha District ten hming an ziah hnan a ni. May 25 chhun rorelnaah inpumkhatna pawm leh nemngheh niin, inremna ruai theh zui a ni.
Inpumkhatna thuthlung pawimawh bik te
* Kohhran pahnih hming atan ‘Evangelical Church of Maraland’ tih a ni ang.
* Kohhran hmunpui (Headquarters) office chu Saikao (Serkawr) a ni anga, Mission administration a awm ang. Assembly office chu Siaha-ah a awm anga, General Administration a awm ang.
* He inpumkhatna puan a nih rual hian Assembly rorelnain rem a lo tih tawh angin kohhran inpumkhatna hming atan ECM a nih tak avangin CCI(M) chu tihtawp (liquidated) a ni.
* ECM & CCI(M) thil neih (property) zawng zawng chu Assembly pakhat (ECM) hmingin a awm vek ang.
* ECM & CCI(M) hnuaia Pastor, Pre-Pastor, Upa leh Tual Upate ordination /induction chu pawm vek a ni.
* ECM & CCI(M) Assembly hnuaia thawktu zawng zawng (General & Mission) pawm vek a ni.
* Inremna thuthlung hi tihluihna tel loin, chhia leh tha hriatna fim tak hmanga anmahni duhthlanna ngeia ziah a ni, tih dah a ni.