Indopui II-na hun laia thil thleng, June 1944-a Nagaland khawpui Kohima hualbehna leh chhanchhuahna chanchin ziahna lehkhabu “His Majesty’s Headhunter – the siege of Kohima that shaped world history” tih chu Zirtawpni khan chief minister Lalduhoma’n Aizawlah a tlangzarh.
Chief minister chuan he indonaah hian Mizo tlangval engemawzat an tel a, Finance minister ni ta Pu J Lalsangzuala pawh a tel a, nunna chan zingah Lalbuaia Lushai a tel tih sawiin, “Kha thil thleng khan khawvelah nghawng a neih len em avangin ziaktu thenkhat chuan ‘Stalingard of the East’ an ti hial a. Japan ral lian kaltluang lai an tawlhkir lehna bulpui pakhata ngaih a ni. He indonaa Naga-te huaisenzia leh an ram leh hnam chhan tura an inpekna ropui zia kha a entawntlak hle,” a ti.
Lehkhabu ziaktu Mmhonlumo Kikon chuan he lehkhabu hian tunhmaa India hmarchhaka Indopui II-na chanchin a tarlang a, tun hnuah state hrang kan lo awm tak thliah thliah avangin Nagaland a thil thleng a ang ta mai zawk tih a sawi. “British ho min awp lai khan helai vela cheng hote hming leh hmun hmingte anmahni lam thiam zawngin an phuah foa, keinin kan lo chhawm a, thil tam tak kan hriat fuh loh phah zui a. Tunah chuan keimahni ngeiin kan history kan hmuh dan dik kan phochhuah ve a hun tawh a. He lehkhabu hian chu chu a tum lian ber pakhat a ni,” a ti.
Kohima indo chanchin tlangzarh
