Persons with Disabilities (PwD) commissioner Vanlaldiki Sailo chuan Kolasib huamchhunga sawrkar hmunhma hrang hrang tlawhin, vohbik tana awlsam zawka luh chhuah theihna (access audit) an siam dan a enfiah.
PwD commissioner chuan, vohbikten ngaihsak an mamawh bik tih a sawi a. “Pianphunga rualbanloten pangngai taka nun an hman ve theihnan a tulna apiangah kan tanpui a ngai. Fuke kim tha tak pawh nakina ramtuileiloa la awm thei reng kan ni a. Sawrkar laipui duh dan angin, sawrkar pisaah, zirna inah, biak in leh vantlang punkhawmna hmunah vohbikte tana hman awlsam tur hmunhma kan buatsaih a tul hle,” a ti.
Ram changkang apiangah vohbikte an ngaihsak zual ta, an tana hamthatna awm thei ang ang hmuh chhuah sakin, an theihna sawrkarin a chhawr tangkai thin tih a sawi a. Mizoramah pawh vohbikte tana luh chhuah leh hman nuam tur hmunhma kan siamsak a pawimawh hle tih a sawi a ni.
Mizoramah Persons with Disabilities commissioner office hmalaknain 2025 February 21 atang khan ‘access audit’ hi neih tan a ni a. Tun tumah hian Kolasib DC office, District Hospital, Govt. Kolasib College, St. John’s Higher Secondary School leh The Salvation Army hnuaia Home for the Blind endik a ni. Mizorama district 9-ah he programme hi kalpui tawh niin, Mizoram pumah endik vek tum a ni.
Sawrkar laipui chuan India rama rualbanlote hamthatna tura a duan pakhat ‘Accessible India Campaign’ hnuaiah access audit hi a ngaipawimawh hle a. Rualbanloten khawi hmun pawh harsa loa an thlen ve theihnan – wheelchair hmang, mitdel leh a dangte tan, mipui punkhawmna vantlang building hrang hrang, biak in, sawrkar pisa, zirna in leh a dangte siamrem ngei ngei tur, tiin khauh takin thupek a siam a. Hemi bawhzui hian Audit Team leh rualbanlo aiawhten heng hmun hi an endik thin a ni.
Access audit neihnaah hian vohbikten khawilai pawh awlsam taka an thlen theihnan wheelchair hman ngaihna hmun, mitdel tana braille tarna hmun siam, mipui punkhawmna vantlang hmunhma hrang hranga an kalvelna tur endik a ni a. Hmunhma buatsaih dan tur ruahmanna (drawing) hlan nghal a ni.
Kolasib-a hmunhma hoah vohbik tana ruahmanna siam dan enfiah
