Nimin khan MLA Inthlanpui, 2023-a Kolasib District chhunga assembly bial pathuma inthlan chuhtu candidate-te inthlan kaihhnawih sum senso chhinchhiahna, election expenditure account chu Kolasib DC Conference Hall-ah Kolasib District tana Expenditure Observer Karni Dan hovin endik thawh khatna neih a ni.
Kolasib district chhunga assembly bial pathuma inthlan chuhtu candidate mi 13 expenditure agent theuhte’n account an vawn chu endik niin, Election Expenditure Monitoring Team-in candidate-te senso an chhinchhiah nen en mil a ni a. Account vawn chungchanga hriat tur pawimawh hrang hrangte inhrilhfiah niin, zawhna leh chhanna leh sawi hona hun hman a ni bawk.
Expenditure inspection hi candidate-te sum hman dan a dik em tih leh an sum hman te dik takin an chhinchhiah fel em tih endik nana ruahman a ni a. Endikna hi inthlan hmain tum thum buatsaih tur niin, October ni 30 leh November ni 4-ah te buatsaih leh a ni ang.
Kolasib-ah election expenditure endik
