Kolasib-ah hmeichhia piang
tam zawk, mipa thi tam zawk
Kumin July atanga September inkar khan Kolasib district-a nau piang zingah hmeichhia an tam zawk a, mitthi hrim hrimah mipa an tam zawk.
District Research Office Kolasib-in quarter (kum khata thla thum dan zel) tina mipui leh sawrkar, researcher leh pawl hrang hrang tana tangkai tur ‘Kolasib District Quarterly Statistical Bulletin, September Quarter 2024’ a buatsaih chu bawrhsap Robert C.Lalhmangaiha chuan Thawhtanni khan a tlangzarh.
He Bulletin-a tarlan danin, Kolasib district-ah village council 56 a awm a, sub-village/ VC pakhat (South Chhimluang) a awm. Kumin July atanga September chhung khan an district-ah nau piang 353 awmin, 172 chu mipa, 181 hmeichhia an ni. Mitthi 147 an awm a, mipa 83 leh hmeichhia 64 an ni.
July-Sept 2024 chhunga Kolasib district-a birth rate chu 3.06 (per 1000) a ni a, death rate chu 1.26 (per 1000) a ni.
Hemi hun chhunga DRO office-in a chhinchhiahnaah an district-a mithhi-ah thih chhan tam ber chu cancer niin, 22 an ni. Stroke 18 leh thin (liver) tha lo 18 chu a tam leh deuh a ni.
Sustainable Development Goals (SDGs) a Kolasib District Performance chu 2021- 2022 North East India Index tarlan a ni a. Kolasib district hi NE India-a district 120 thlanchhuah zingah SDG-a titha 12-na a ni a, Mizoramah pathumna a ni.
Kolasib-ah hmeichhia piang tam zawk, mipa thi tam zawk
