HIV leh a kaihhnawih natna inkaichhawn theih chi hrang hrang, tan in (jail) leh khuahkhirh ngai enkawlna hmun hrang hranga hmalakna tur ‘Integrated STI, HIV, TB & Hepatitis (ISHTH) Campaign’ kalpui tum inbuatsaihna atan Thawhtanni khan Kolasibah mawhphurna hrang hrang inhrilhhriat a ni.
He hun hmanpuitu Kolasib district bawrhsap John LT Sanga chuan HIV hrik kai hmuhchhuah tamna district an nih angin, he hrik darh zel tur venna leh he hrik kaihhnawih natna dang dapchhuah leh enkawl tura ISHTH Campaign kalpui tum chu lawmawm a tih thu a sawi a. Zirchianna thenkhata a lan danin, mihring, a huhoa enkawlna hmun, District Jail leh De-Addiction Centre ah te chuan heng hri inkaidarhna hi a hluar bik tih hmuhchhuah a nih angin, Kolasib district-a heng hmunahte hian campaign neih a ni dawn tih a sawi. State thenawmte nen ramri intawm an nih angin, natna inkaichhawn theih hrang hrang veite dap chhuah leh enkawlna pe tura hmalakna chuan ram pum hriselna thui tak a tha zawngin a nghawng ngei a beisei tih a sawi a ni.
Kolasib District Hospital senior medical officer Dr RK Lalthlamuana report danin, ISHTH Campaign chhung hian District Jail, Jordan Home Sethawn, Golgotha Home Vairengte, TNT Khuangpuilam, Swadhar Greh Kolasib leh Vairengtea enkawl mek mi 350 vel hriselna endik a ni anga; STI, HIV, TB leh Hepatitis hrik an vei leh vei loh endik a ni anga, a tul dan azirin counselling leh enkawlna an pe dawn a ni.
Kolasib-ah jail leh home amite HIV/TB/STI endik sak dawn
