District Level Monitoring Committee on CSS – FPO Formation Kolasib chu Thawhlehni khan an thukhawm a. District chhunga hmalak tawhna thlirletin ‘Formation & Promotion of 10000 Farmer Producer Organization’ chungchang sawizau a ni bawk.
Thutkhawma tarlan danin, Clover Organic Pvt. Ltd. kaltlangin Thingdawl Rural Development Block hnuaiah a thawhkhatna atan dragonfruit tharchhuah leh hralh kawnga hmalakna kalpui a ni a. Vangmawi Organic FPO-in hma la in, state pawna thawn chhuah turin ruahman a nih rualin, thawn chhuak tura sawngbawlna hrang hrangah senso a hautak avangin beisei angin ruahmanna a hlawhtlin tak loh thu an sawi a. Ruahmanna thar, senso tlem zawk leh loneitute tana hlawk zawk tur duan mek a nih thu sawi a ni.
National Agricultural Cooperative Marketing Federation of India atanga thawktute chuan Bilkhawthlir RD Block-a tel antam (Rape seed) leh vaimima hmalak tum dan an sawifiah a. Mizoram district hrang hrang zingah Kolasib district chu vaimim thar tam lamah dinhmun pahnihna a luah mek tih sawiin, Chemphai, Buhchangphai leh Bilkhawthlirahte chhungkaw 200 chuangin vaimim an ching a ni.
Thutkhawm kaihruaitu district bawrhsap John LT Sanga chuan sawrkar laipui ruahmannaa loneitute chawikanna tur, ‘Formation & Promotion of 10000 FPO’ chu hlawhtling ngei tura kalpui a nih theihna’n District Level Monitoring Committee chuan an hmalakna a enpui zel dawn tih a sawi a. Ei leh ina intodelh theihna’n leh kuthnathawktute dinhmun chawikanna hmanraw tangkai a nih theihna’n thahnemngai taka hma la turin a chah a ni.
Kolasib district-a FPO hmasawnna tur sawi
