National Highway 306 & 06 Sairang leh Vairengte, Kolasib district chhung bika kawng chhia avanga mipui harsatna tawh dan leh chak zawka thawmthat dan tur ngaihtuahin Thawhlehni khan Kolasib district bawrhsap Robert C Lalhmangaiha hoa thutkhawm a ni.
Bawrhsap chuan ruahtui tlak chhung chu October hawlh pha tura ngaih a nih avangin engtin nge hemi hun chhung hian mipui harsatna chhawk zangkhai a nih ang tih ngaihpawimawh hmasak a ngai tih a sawi a. Kawnpui leh Bualpui khaw zirlai nu leh pa aiawhte hnenah kawng chhiat vanga an faten school an tlai thin chu pawi a tih thu sawiin, a hun pangngai anga an kala an haw theih nan hma an lak tur thu a hrilh.
Kawng dan tum lirtheia eizawngtu pawl pawh state mipui a nghawng tur ngaihtuah a, an thu tih tluk tawh ngaihtuah tha turin a ngen bawk.
Thutkhawmah hian kawng chhia chungchanga hmalak dan tur sawi ho a ni a. A bikin RTP Sethawn leh Kawnpui /Bualpui quarry inkar, kawng chhiat avanga lirthei tangkhang rei thei lutuk tih ziaawm dan tur sawi a ni. Hun tiam neiin a khuar zual lai hnawh, zirlaiten a hun taka school an thlen theih nan zing lam school kal hun leh tlai ban huna lirthei lian (HMV) tlan phal loh hun siam rel a ni.
Traffic movement felfai tak a awm theih nan Sethawn leh Kawnpui /Bualpui quarry inkarah zan lamah SP office-in traffic duty an dah anga, chhun lamah NHIDCL contractor mi rawihten an vil thung ang. Kawng dinhmun en thlithlaia thlirlet thin tur Working Committee din rel a ni bawk.
Thutkhawmah hian DC official-te, police hotute, NHIDCL hotute, Kawnpui SDO (C), MPWD hotute, contractor-te, Kawnpui leh Bualpuia zirlai nu leh pa aiawh, Kawnpui, Bualpui leh Thingdawl VC member-te leh lirthei neitu Joint Committee hruaitute an tel a ni.
Kolasib district-a kawng chhiat chhung atan ruahmanna siam
