Bank-a mipuiin sum an dah luh (deposit) zat za zela bank-in mipuia sum an puktir (credit) zat chhutna, Credit-Deposit Ratio ah Kolasib district-a bank-te chuan sawrkar kum kal mek quarter hmasa ber (April -June) ah national benchmark 60% khumin 63.49% an nei.
Kolasib District Consultative Committee (DCC), District Level Review Committee (DLRC) leh District Level Security Committee (DLSC) chu an chairman, district bawrhsap John LT Sanga hoin Thawhtanni khan an thukhawm a. Kumin April atanga June (1st quarter 2023-24) chhunga an district-a bank hrang hrang hnathawh thlirletin, hmachhawp an neih leh hmalak zui dan tur sawi ho a ni.
Thutkhawma report danin, April – June 2023 inkar chhungin bank hrang hrang kaltlangin mipui hnena sum hman leh enkawl dan inzirtirna (financial literacy campaign) tum 19 buatsaih a ni a. Line department-te nen tangho leh NABARD atanga fund dil theih dilin, bank-ten FLC tam zawk buatsaih turin hma la se, an ti. Bank-a deposit zat atanga za zela bank-in credit a neih zat chhutna, CD Ratio-ah Kolasib district-a bank-te chuan June 2023-ah national benchmark 60% khumin CD Ratio 63.49% an nei a. Hetih rual hian CD Ratio tha lehzual a awm theih nan bank-te chuan tan la se, tih a ni.
2023-2024 sawrkar kum chhunga Kolasib district-a bank-ten loan an pek chhuah dan tur, Annual Credit Plan (ACP) ruahmanah June 2023 thlenga bank-in an pek chhuah tawh zat chu 16.91% a ni a. Bank-ten ACP hnuaia an target tlin ngei turin tan la se, tih niin, mipui harsa zawk leh kuthnathawktute chhawr theih tur loan thenkhat, a bikin, Kisan Credit Card (KCC), Agriculture loan, MMSE loan leh MUDRA loan ang chi, sawrkar sponsor scheme PMEGP, NRLM leh NULM ang chi-ah tan lak lehzual nise, an ti.
Financial inclusion plan hnuaiah Kolasib district-a mihring 2000 aia tlem chenna khaw 29 chu bank hrang hrangten chan insemin, bank kaltlanga hamthatna an chhawr ve theih nan hma lak a nih thu sawi a ni. Sum dah hmasa lo (zero balance) a account hawn theihna – PMJDY leh social security scheme hrang hrang – PMJJBY, PMSBY leh APY lama bank hmalak dan thlirho niin, mipui tam zawkin heng hamthatna hi an chhawr theih nan tan lak lehzual nise, an ti bawk.
Kolasib district CD Ratio 63.49%
