Kolasib khawpui bawlhhlawh sawngbawlna hmun, Dihmuntlang ami chuan ngaihsak a hlawh tawk loa, management a fel loh avangin dumping ground leh a chhehvelah bawlhhlawh chhunkhawm a tam hle tih sawi a ni.
MJA Kolasib District chuan Ningani khan Dihmuntlanga Solid Waste Management Centre hi an tlawh a. He Centre hi pilot project niin, Aizawl khawpui bakah district headquarters tihna awmchhun a ni. He centre-ah hian thawktu quarter-te nen building changtlung tak awm mah se, heng building hi vawiin thlengin luahtu awm mumal loin a tawngtawl a; Waste Resource Centre-ah hian bailing machine pakhat leh bawlhhlawh nawrna tur thela awmin, bawlhhlawh thliarhranna khawl – belt conveyor machine a awm lo bawk.
Bawlhhlawh dahkhawm sawngbawl hna hi mimal pahnih kuta dah niin, an ni hian hlawhfa ruaiin bawlhhlawh thliarhran hna an thawk a, team khat hi tun thla tir atanga thawk tan chauh an ni.
Nikhata bawlhhlawh trip hnih chhunkhawmna, Solid Waste Management Centre-ah hian thawktu awm reng chungin bawlhhlawh hi a khat deuh reng thin a. Dumping ground chhehvelah bawlhhlawh a khat vek thin tih sawi a ni. A zualpui erawh tunhnaiah excavator hmanga thenfai a ni a. Nitin truck trip hnih chauh a luh avangin a awmsa an thliar zawh hnuah chuan hahdam zawka an thawh theih an beisei tih a hmuna thawktute chuan sawiin, tunah thawktu 11 an awm.
DUDO Kolasib sawi danin, bawlhhlawh tawih thei lote hi a hralh theih tur chi leh dumping ground-a paih tur chi an thliar hnuah a hralh theih tur hi bundle-a siama hralh tur a ni a, a leitu tura sawrkarin a thlan – No Waste Pvt Ltd chuan bawlhhlawh thliarhran a that tawk loh avangin a hralhna lamah harsatna an tawk niin an sawi. Hetihrual hian sawrkar nena MoU an ziah pawh a tawp rih tih sawiin, buaipui zui an tum tawh lo tih an sawi a. Hei vang hian vawiin thlengin heng bawlhhlawh bundle hi mumal taka hralhchhuah a awm lo.
Kolasiba bawlhhlawh sawngbawlna hmunin ngaihsak a hlawh tawk lo
