Kolkata-a Durga Puja-a innek buainaah mi 19 thi

India khawchhak lama Hindu kût lawmna hmuna innek buaina thlengah mi 19 vel an thi a, mi dang 25-in hliam an tuar bawk tih thuneituten an sawi.
West Bengal khawpui, Kolkata-a Inrinni zana thil thleng hi Hindu kût, an pathiannu, Durga puala an hman thin, Durga Puja lawmnaah niin ruah a sur avanga dawhsan (pavilion) pana mi tam tak an tlan khawm laiin a ni.
Police chuan mi thenkhatah kawngah an tlu a, an hnunga miten an chil zui niin an sawi.
Hliam tuar leh ruang an lak khawmna, Kolkata Medical College & Hospital tlawhtu, West Bengal Chief Minister Suvendu Adhikari-a chuan mi 19 an thih thu leh mi dang 25 enkawl mek an nih thu a sawi.
Thi zingah hian hmeichhe naupang kum sarih mi pawh a tel niin Adhikari-a hian a sawi.
A chhui chiang tur, special investigation team din niin high court judge hlui kaihhruai tur a nih thu a sawi bawk.
Police chuan he hun buatsaihtu, mi mal hnuaia venhim hna thawktu leh a hmuna duty thenkhat an man a, mipui tam lutuk thunun tura an inkaihhruaina leh himna dan zam zawm loh a awm em tih an chhui zui dawn.
Police chuan kût lawmna atan hian Durga Puja pandal siam chawl a ni a, hetah hian mi sang tel an kal khawm niin an sawi.
Police thuchhuah chuan innek buaina hi ruah sur karah ‘mi tam takin pandal an bawr laiin a thleng’ niin an tar lang.
Police hotu pakhat, a hmuna awm chuan ruah a sur a, ‘pandal pawn lama awmte chuan an rawn nem a, an inpawt a, hma lamah an tlu ta hlawm a, an innek buai ta nuaih nuaih a ni’ tiin a sawi.
Prime Minister Narendra Modi-a pawhin he thil thleng pawi a tih thu a sawi a. “A tuartute ka tawrhpui a, hliam tuarte pawh tha taka dam leh turin duhsakna ka hlan a. West Bengal sorkar pawh a tul apiangah puih an ni ang,” tiin X-ah a tar lang.
Modi-a pisa hian thi chhungte hnenah Rs. 2,00,000 theuh pek an nih tur thu leh hliam tuarte pawh Rs. 50,000-a kan an nih tur thu a sawi.
Durga Puja lawmna tur hian Kolkata-ah ringawt pandal 3,500 vel zar a ni a. Inrinni zana chhiatna a thlen hnuah thuneitute chuan mi hip khawm tam deuh hmunte chu a khar phah.
India-ah hian mipui pun khawm tamnaah hian innek buaina avanga thihna lian tak tak a thleng fo tawh thin a, hengte hi mipui thununna a chhiat avang leh himna tura dan zamten zawm a hlawh tawk loh thin vang a ni fo thin.
Nikum khan sakhaw thila punkhawmna tho, Kumbh Mela-ah mi 30 thiin mi dang eng emaw zatin hliam an tuar a. Bengaluru-ah Indian Premier League-a tual chhung team champion lawmnaah mi 11 an thi bawk.
Tamil Nadu-ah lemchang thiam, politic khel zui tain a campaign-naa innek buainaah mi 36 an thi a. Kum 2024 khar hmar lam, Uttar Pradesh-a Hindu kût lawmnaah mi 121 an thi bawk.