West Bengal sorkar chu doctor thihna chungchangah an la hmingchhe tluang zel a, doctor te chuan an doctor pui thihna chungchangah an lungawina leh an duh dan engmah sorkar in a la tihsak lo tih sawiin, nawrh dan an thlak leh tan.
Doctor te hian sorkar atanga an thil phut leh an duh ang hmalakna engmah a awm lo nia sawiin, an hnathawhna hmuna duty loh zawngin nawrhna hi an kalpui leh char char tawh a, zirtawpni khan mamawhna a san em avangin darkar 24 chhung an titawp lailawk zuai thung.
Reporter thenkhat hnenah doctor te hian sorkar atangin an duh ang tihhlawhtlin tumna engmah a la awm lo tiin an sawi a, mipui lam atanga mamawhna a san tawh em avanga zirtawpni pawh khan duty leh zuai an nih thu sawiin, an nawrhna hi a la tawp lo tih an sawi.
Doctor pakhat chuan, inrinni atang khan chawngheia nawrh huaihawt an tan leh thu leh, midang pawhin an lo zawm belh zel tih sawiin, ngawih mai an tum lo tih a sawi bawk.
Doctor zirlai leh thawk tawh ho hian an nawrh chhan chu sorkar tan tihhlawhtlin nghal mai theih a nih thu sawiin, thil harsa a ni lo an ti a, sorkar chuan a ngaihthah vang liau liau a an thil phut chu la tihlawhtling lo a nih thu sawiin, an lungawi lo hle.
Hetih lai hian doctor te thil phut chungchangah hian chief minister Mamata Banerjee chuan engmah a la sawi thar rih lo thung.
Kolkata doctor te la nuar zawm zel
