Korea ramah No. 1 thar Sinner leh a pawhthlak Alcaraz innuai dawn!
Tunlai mipa tennis singles huang bika in champion chhawk tih loh theih loh Carlos Alcaraz leh Jannik Sinner-te chuan kum thar January thla hian Asia khawmualpui an rawn chuang chhuak dawn a, Australian Open khelh tan hma ni riat chiah a la awm tihin South Korea ramah exhibition match an khel dun dawn.
Sinner leh Alcaraz hi January ni 10 khian Incheon khawpuia Hyundai Card Super Match-ah an inhmachhawn leh dawn a, January ni 18 atangin Melbourne khawpuiah Australian Open main draw an khel tan dawn a, major tournament hmasaber atana inbuatsaihna a ni nghal ang.
An career-a tum 15 an intum tawhah Alcaraz hi head-to-head record-ah a chungnung zawk a, vawi 10 a chak laiin Sinner hi tum nga a chak ve thung.
Italian Sinner leh Spaniard Alcaraz-te hi kumin Grand Slam final palia vawi thumah an intawng a, major title hnuhnung 10 zinga pakua chu an pahnih lak belhkhawm a ni!
Nimin lama tarlan tawh angin, Pathianni Paris Masters hnehna a chan rual khan Sinner hian Alcaraz kut atangin world number one nihna a lakir a; Felix Auger-Aliassime laka 6-4 7-6 (7-4) hnehna a chan avang khan Italian hian ranking-ah point 250-in a elpui lian ber Alcaraz a kalsan ta a; November ni 9-a season-ending ATP finals zawh lamah tunge No. 1 ni chunga kum khar tur a chiang chauh thung ang.
Kumin French Open final pui takah khan Spaniard a dingchang zawk a, July thla Wimbledon final-ah Italian chuan phuba a la ve thung.
An pahnih intum hnuhnung berah erawh Alcaraz chakin, kumin Setember thla US Open trophy hlawhchhuaka a career-a Grand Slam title paruk a lak tlinna kawngah Sinner a hneh.
Korea ramah No. 1 thar Sinner leh a pawhthlak Alcaraz innuai dawn!
