Kristian |halai Pawl rorel inkhawm chuan ruihhlo dona lama hmalak an rel a. Hetia Kristian thalaiten, kawng dik lo zawh mek an thalaipuite chhanchhuak tura beihpui thlak an rel hi a lawmawm hle a, an tihawm tak pawh a ni awm e. Sakhaw thila rawngbawlna pawimawh tak a nih rualin, ram leh hnam inrelbawlna kawngah pawh contribution ropui tak a ni nghal dawn a ni.
Tunhma atang tawhin, K|P inkhawmpuiah leh engemaw puipunna lianthamah chuan ruihhlo thatlohzia lantirna short drama leh video te pawh buatsaih a lo ni tawh thin a; awmzia thui tak nei tura ngaih leh beisei a nih laiin, thu leh hla mai ni lo, a taka thawhchhuahna tak tak hmanga hmalakna hian awmzia a nei thui zawkin a sawt zawk pawh a rinawm. Biak ina lawi lut duh chinte chauh hnena rawngbawlna kalpui hi intihchak tawnna kawngah tha viau bawk mah se, Biak in pawn lama a taka vah chhuah hi Kristian thalaite rawngbawlna awm hliah hliah pawh a ni.
Ruihhlo ngai zingah kumtling lo an tam chho tual tual hi a veiawm zual hle a. Kumtling lo ruihhlo ngaite hi uluk taka zirchian a, eng environment hnuai atanga ruihhlo hi ti ve ta mai nge an nih tih hriatchian hi step pawimawh hmasa a nih a rinawm. KTP pawh hian survey & research behchhana hma an lak a, roadmap fel tak duang chhuak hmasaa hma an lak theih chuan, a ler lama thuai nghal ngawt ai chuan a daihrei zawkin a sawt zawk pawh a rinawm a. Hetih rual hian, sawrkar lama a kaihhnawih department hrang hrangte nen pawha inthlunzawmna awmze nei tak siam a pawimawh dawn tih a lang bawk awm e.
Ruihhlo a hluar chak ta lutuk hi sawrkar pawhin tun aia na zawka a vei a, mutmawh hnarmawha a neih a ngai takzet tawh. A kum telin ruihhlo man chhuah a tam chho a, man chhuah loh hi a tam zawk fe tura ngaih a ni lehnghal. Tuna kan dinhmunin a phut ta chu, ruihhlo lo luhna Khan Pui lo hnawh pin dan zawn chhuah hi a ni ta awm e.
K|P leh ruihhlo do
