Krismas Bazar hi Mizoramah mipui nghahhlelh a ni a, sumdawngte’n an nghakhlel zawk mai thei. Tun tum Krismas Bazar erawhin sumdawngte beisei a pha lo.
Krismas lai hi mi ‘pawk’ lai a ni a, sumdawngte inhralh theih lai niin, thawmhnaw zuarte ngat phei chuan Krismas Bazar hi an nghakhlel zual ang. Thawmhnaw zuar thenkhat phei chuan November thlenga kum tluana an hralh aiin December-a an hralh a tam zawk tih te an sawi. Tun tum Krismas Bazar-ah erawh inhralh a har an ti hlawm.
2024 Krismas Bazar-ah dawrkaite’n inhralh a har an ti a, kum dang an phak loh thu an sawi. Thawmhnaw zuarte’n an inhralh that loh thu an sawi a, mipa thawmhnaw pawh, hmeichhe thawmhnaw pawh, inhralh a har ve ve an ti.
“Nuai 20 chuangin a hma kuma kan lei zat kan pha lo,” dawrkai pakhat chuan a ti a, “Kum hmasa aiin 30% velin kan hniam niin kan hria,” dawrkai dang pakhat chuan a ti.
Mizorama thawmhnaw zuarte’n mipa thawmhnaw leh India siam leh China siam an la hlawm a, hmeichhe thawmhnaw chu China chhuak an la deuh vek tia sawi theih a ni. Hmeichhe thawmhnaw hi a lakna a hlat avangin senso pawh a sang zawk a, a thing hma bawk. Chuvangin hmeichhe thawmhnaw hralh loh hi a nghawng a lian zawkah an ngai.
Thawmhnaw zuarte’n lo inla tam mah mah an inti a, hralh bang an ngah thu an sawi hlawm. Bazar-a kal pawh kum dang aiin an tlem an ti a, a lun tho na a, kum dang anga tawt luih luih, dawrnghaktute tana chhun thingpui in hman loh khawp ang kha a awm lo an ti.
“Mihring an chhuak tho na a, kum dang ang chu a ni lo. Sum a tlem a nih kan ring a, kum dang aia Krismas Bazar a lun loh chhan hi kan hre bik chiah lo, sum a vang a ni ang kan ti mai,” dawrkai pakhat chuan a ti.
December-a an hralh that thin grape juice pawh an hralh tha lo a, a zuarte’n kum dang an pha lo tih thu dawn a ni.
Krismas Bazar-ah inhralh a har
