Kumin December thla chhung zawnga kalpui tur Mizorama blood bank hrang hranga ‘Krismas puala thisen pek’ chu Zirtawpni khan Civil Hospital Aizawl Blood Bank-ah National Health Mission (NHM) mission director Dr Eric Zomawia’n a hawng.
NHM mission director chuan, Association for Voluntary Blood Donation leh an thawhpuiten Krismas puala thisen pek an huaihawt thin chu damlo, thisen mamawhte tan a hlu takzet tih sawiin, thisen hmanga mihringte chhandamtu Isua piang lawm nan leh midangte nunna chhan nan thisen pe turin Mizo thalaite a sawm tih a sawi.
AVBD president C Lalnunnema chuan Mizorama hunpui lai, Krismas leh kumthar vuakvetah pawl hrang hrang an buai a, kum tharah pawl insiamrem lai a nih bawk avangin pawl hminga thisen pe an tlem thin tih sawiin, “Hengte avang hian kum 2010 atang khan Krismas puala thisen pek hi buatsaih a ni,” a ti.
Krismas puala thisen pek hi AVBD, MSACS, NHM leh blood bank hrang hrangte huaihawt a ni a. December 2023 chhung zawng kalpui a ni dawn. Blood bank-ah kalin thisen pek theih a ni a, thisen petute hnenah eitur leh thilpek pek zel a ni.
A hawn ni-ah hian Govt. Mamawii Higher Secondary School NSS-in thisen unit 18 an pe nghal a, petute hmeichhia vek an ni.
Aizawla Krismas pual thisen pek tawh dan:
No. Blood Bank 2019 2020 2021 2022
1. Civil Hospital Aizawl 690 1108 1378 1661
2. Synod Hospital 338 179 317 267
3. ZMC 64 26 128 NA