KRISTIAN NUN NGHET

By Rev Dr Ramengliana

Zirtirna thenkhatah chuan Kristian nghet hi kan awm lo a, kan awm thei lo bawk a ni awm e. “Krista chauh a nghet a mihring chu kan nghet thei lo, nghet tur pawhin Pathianin min phut lo,” tiin an sawi thin. Ril awm takin a langa mahse ngaihtuah chian dawl lo tak a ni. Kristian nunah hian nghet takin a kal theih tih hriat a tha. “Nghet takin, tihchet rual lohvin…” (I Kor. 15:58) tih a nih kha maw. Chu nun nghet chu thlarau nun insawizawina tha taka lain a neih theih a ni. Hun pawh a duh rei ang. Ringtu dik tak chuan a pianthar veleh bul a tan a ni nghal bawk a. Kristian nun nghet chu a hnuaia mite atang hian hriat fiah lehzual i han tum teh ang:
1. Sual langsar laka fihlim
A chekngel zawnga kan chhut chuan tumah sual laka fihlim kan awm lo. Heti a nih vang hian mi thenkhat zirtir danah chuan Kohhran Upa, nun uluk em em leh khawlaia rui thle mai mai hi Pathiana an dinhmun inang (tling lo) rengin an sawi thei mai. A nih lohzia kan hre theuhin ka ring. Sual langsar tak tak – Pathian biak leh a rawngbawlna ngaihthah, ruih theih thil chin, mipat-hmeichhiatna hman khawloh, eiruk, midangte nena innghirngho, etc. laka fihlim hi Kristian nun nghet zia a ni. Sual langsarah pawh fihlim lote hi chu sual te zawk, mite hmuh phak lovah phei chuan an him lo lehzualin a rin theih a ni.
Setana trick pakhat chu kan buaipui tur tak aia a bul hnaia thil pawimawh lo zawk hret min ngaihventir daih hi a ni a. Kan focus pawh pen hi a strategy hman tangkai tak a ni. Mi tam tak chuan sual kalsan tura thlarau nun insawizawi pawimawhzia aiin suala kan fihlim theih lohziate hi an uar ta daih mai thin a! Mi rethei chanai nuai tel tak meuh meuh eiruk leh office kal tlai pangngai te pawh ‘corruption’ huangah khung vekin a pawi dan thuhmun titihin an sawi thei a ni! Rilru leh taksa thilah hian sual a tam khawp mai a, dam chhunga kan beih reng tur pawh a awm ang. Amaherawhchu, sual langsar zualte tal hi chu malmak thap a ngai.
2. Pathian Thu hriat
Kristian tin hi theologian angah kan ngai thei a nih loh pawhin theology chu kan nei theuh a. Mawl bera inngai pawhin Pathian thu pawm dan leh hriat thiam dan bik kan nei theuh va. Chu kan theology chu kan nunpui a ni deuh mai bawk. Pathian Thu kan hriat leh kan pawm dan hian kan Kristian nun a hril thui hle a. Kristian nun nghet neitute chuan Pathian Thu hriatna puitling tak an nei thin. Hei hi nghehna nun nei tura thil pawimawh hmasa a ni awm e.
Zirtirna tharlamin a chhem len vel mai mai theih hi Kristian nghet an ni ngai lova, thuhriltu thenkhat tawngkam thiamna avang mai maia thar ta vuka inhria leh phur thar ta hlut thin te hi Kristian nun nghet nei an ni ngai meuh lo. Kristian nuna nghet tak chuan Kohhran zirtirna laipui hi a hre chiang hle a; chu bak chu Pathian Thu tak tak a awm chuang lo a ni tih a hre bawk. Mahni lawina kohhran pawn lama thlarau chaw zawng dun dun te hi mi ngaihtuahawm tak an ni chawk. Ei zawng tak an lo nei a nih pawhin mi puitling chuan pawm dan leh lo dawnsawn dan tawk an thiam thin a ni.
3. Rawngbawlna rilru put
Ringtu inti rawngbawlna rilru nei mang hauh lo, mahni ngaih pawimawh leh tha tih lam uma midangte tana rawngbawlna ngaithah tlat hi kan awm thin. Hetiang mi hi Kristian nun dik leh nghet nei kan ti ngai lo. Kan Pathian hi missionary a ni a, Isua Krista kha missionary dik tak a ni bawk. Chuvangin Kristian dik tak chuan missionary rilru a pu thin a ni. Missionary rilru pu kan tih chu, Chanchin Tha hre tura midangte duhsakna leh chumi atana mahni inpekna thinlung neih hi a ni.
Kristian nun nghet neitu chuan kohhrana rawngbawlna a ngai pawimawh a, missionary rilru puin a nun a hmang thin. Rawngbawlna thilah inpein a che chhuak thin a ni ber e. Hei hian inphalna leh ngaihvenna kawk nghal bawk a. Harsatna dangin a tlakbuak a nih ngawt loh chuan, rawngbawlna thilah chuan tel ngei ngei tura miin an rin leh beisei tlat tawh ang chi hi NUN NGHET NEI kan ti tlangpui thin. Hmel lan ve turah pawh an ngaih loh mi nih hi thil pawi tak a tling a ni.
4. Ni tin eizawnnaa rinawm
Ni tin eizawn hi kan tih makmawh leh ngaihthah theih hauh loh a ni. Mi thenkhat, Kohhran thiltih leh rawngbawlnaa langsar tak, ni tin eizawnna hnaa rintlak loh leh rinawm lo an awm. Hei hi thil pawi tak a ni. Hetiang mite hian Pathian leh a Kohhran an tihmingchhe thin hle a ni. Hre chiangtuten an ring ngai lo. Kohhran upa eiruknaa fihlim lo, KTP hruaitu ni si mahni hnaa zawmthaw tak, Kohhran Hmeichhe hruaitu sumdawnna kawnga mi duham leh midang bum hreh miah lo, sorkar khap thil hmanga intihhausak hreh miah lo rawngbawltu hi Kristian nghet an ni ngai lo. Kristian mahni ni tin hnaa rintlak, duhamna leh thatchhiatnain a tihbuai lem lohte hi Kristian nun nghet neiah miten an chhal thin a ni.
Mizo Kristiante hriat tur pawimawh em em chu kan ni tin eizawnna hi Pathian rawngbawlna a ni tih hi a ni. Mi tam tak chuan hun puma rawngbawlna leh Kohhran activities te hi Pathian hna bika ngaih an bansan mawh khawp mai. An ni tin hna tha taka thawh chu Pathian duh zawng leh Pathian ropuina inpuan chhuah theihna ni chuan an ngai a, amaherawhchu a hna kha Pathian hna a nih an pawm tak tak thei meuh lo. Pastorin a pastor hna thawk tura kan duh ang leh missionaryin a missionary hna thawk tura kan beisei anga kan ni tin hna theuh hi Pathian hna a nihzia kan pawh tlan hunah kan ram a dam ang.
5. Chaw tak zawn thiam
Kristian nun nghet nei chuan chaw tha a zawng thiam thin. Hei hi puitling zia dik tak a ni bawk. Burma sipai commando-a tel tawh pakhat chuan an trainning-naah, an hotuten ei tur engmah kentir lovin chawlhkar hnih chhung tawp ramhnuaia an tlat chhuahtir thu a sawi. Mahnia ei tur inzawn chawp a ngai a, mahni dam khawchhuahna tur buaipui tur a ni. A hreawmin a hautak hle ang. Mahse, he training hi commando tha nih nan a tul tlat si. Mahnia ram hnuaia tal thei chu commando tha an nih angin mahnia chaw tha leh ei tur tha hmu thiam hi nun nghet nei an ni. Mi thenkhat chuan Nilai zan inkhawmah te, Inrinni zanah leh thusawi thiam tak ni lem lovin thu an sawite hian Thlarau lam chaw an hmu lo mai thin a. An bei a dawng a, an chak loh phah thuai thin.
Ringtu nghet erawh chuan Pathian Biakna engah pawh hian thlarau lam chaw tha a hmu a, thu sawi nung lo an tih pawh a tan chuan an lo awm har khawp mai. Tin, kohhran hnatlang, KTP leh Kohhran thiltih hrang hrang bakah, mahni ni tin eizawnna hmunah pawh chaw tha tak an hmu thei zel mai. A sawitu thiam leh thiam loh emaw, a satu awm mawi leh mawi loh emaw pawh a ni ber tawh lo. |awngkam thiam leh sawi tlawr thiam nazawngin chaw tha an pe bik chuang lo tih a hre chiang a; mihring tam leh thawm nat avang ringawtin Thlarau lam vitamin a tam chuang hek lo tih a hre chiang em em bawk a. Kristian nun nghet neitu chuan amahin a sawtpui tur chaw tha hmuhna bik a hre ngei ang.
Kristian zirtirna leh nunphungin a chiah hneh tak kan ramah hian Kristian nun nghet neih hi a har lo viau tih chu a lang reng a. Keimahni zawk hian kan ngaihhlut leh hlut loh azir a ni thui viau dawn a ni. Pathianin hemi kawnga kan kal theih nan hian hmanrua a dah hnem viau mai a. Pathian Thu sawipui mai tur an awm te, zan tin deuhthawa inkhawm dar a ri vang vang thin te, chhung inkhawm kan neih thin leh kan inchhunga Mizo Bible a han let ngat mai ringawt te pawh hi nghehpui tham chu a ni hrim hrim e.

Comments (0)
Add Comment