Prof Jv Hluna
INTACH Co-Convener
INTACH Executive meeting-ah Mission venga Kristian thlanmual hi Heritage site-a puan ka rawt a, Mission veng Local Council-ah pawh ka rawtna ziakin ka thehlut bawk a. Ka rawtna chhan hi sawi hmasak phawt a tulin ka hria.
Hmanlai chuan Mizo ten thlanmual bik kan nei ngai lova. Mi tin kha mahni kawtah te, in hnuaiah te, thingkhawn hnuaiah te, kawmkar leh kawtkaiah te kan inphum mai thin. Chuvangte pawh a ni ang, khaw hmun ngai rei tak luah hi hrisel lovah ngaiin kan pem thuai thuai a, khaw thar kai reng mai kan ni a, thlan hmun bik neih tul tihna pawh a awm lo.
Mission veng (tun hma a hming Hriangmual) kan Missionary Pu Zosaphluia leh Pu Zosapthara ten Kristian veng ni tura khaw nghet an din khan thianghlimna leh hrisel zawk nan kum 1905 ah thlanmual an lo neihpui tan a. Mizorama thlanmual hmasa ber a ni ta a ni. (C. Vanlallawma – Hringlang tlang p-337) Pu C.Vanlallawma sawi dan chuan kum 1929 khan Mizo leh Vai Chanchinbu Editor Pu Makthangan khaw tin in thlanmual neih a tulzia sei deuh fe a ziak a, chutah chuan Mission Veng Kristian thlanmual leh Saitual lal Dorawta te, Zotlang lal Thanghuta te, Durtlang lal M.Suaka te pawhin thlanmual an neih tawh thu a ziak a. (Lalaudinga-Mizoram Political History 1890-2023 p-48). Mission Venga thlanmual an neih tirh chuan tlangval thlan lai ho hnenah Pu Saphluia chuan “Hmun ren rawh u, tun hnuah a la chep lutuk anga, kan mangang ang e” a ti thin a, tlangval thlan lai ho pawhin Pu Hluia thusawi hi an zawm ve nghal viau a ni awm e.
Makthanga nawrna avangin Bawrhsap (Superintendent) chuan kum 1930 ah chuan khaw tin te thlanmual nei tura thupek a rawn chhuah ta a-
‘Tun chinah lal khua ten mitthi an phumna hmun “Thlanmual” a hran nei sela a tha em em a ni. Khawlai thler leh kawngka bul lawka mitthi phum hi a tha lo a ni. Tun chinah khawdaiah mitthi phumna “Thlanmual” hmun a hranin siam tur a ni. Thu anga siam lo an awm chuan a pawi ang, tuikhur a luang lut thei lo lamah ni rawh se’.
CGG Helme, Superintendent
(Mizo leh Vai chanchinbu 1930, May p-82)
Heta chinah hian Mizoram khaw tinah thlanmual neih a lo ni ta a ni. Hei hi Pu T. Lawmthanga 1915 a Mission Venga piang leh seilian te leh a thiante Upa Chawngzika leh Pu Bawihthuama Mission Venga piang leh seilian Mission bel theuhte pawh khan min hrilh dan a ni.
Tunah kum 120 dawn a lo liam ta a, Mizo thlanmual neih hmasak ber, tun thlenga ala him hi heritage a ni tak meuh meuh a, roh taka enkawl leh venhim a ngai takzet a ni.
Tute nge he thlanmualah hian an phum hmasak ber tih leh mi engzatnge an phum tih kan hre thei tawh lo. Amaherawhchu Mizo milar engemawzat phumna a ni, tlemte hming lo tarlang ila:
Rev Chhuahkhama hi chu Pastor hmasa ber a nih avangin Mission Veng Biak In kawtah phum a ni.
Rev Liangkhaia, Great Bible Teacher, Historian, Writer & Hla phuahtu ropui.
Ch. Pasena, Sap rama lehkha zir hmasa ber, “Zirtirtute Zirtirtu” an tih thin kha.
Rokunga, Poet of the Century.
P.S.Chawngthu, AIR Artist hmasa ber, hlaphuah thiam.
Chhingtei, Mizo Bible Women hmasa.
Khuma, Mizo zinga Baptisma chang hmasa ber.
C.Z.Huala, Great Language Teacher (Bawrhsap leh Lt.Governor te Zo tawng zirtirtu, harhna hla phuahtu)
Zalawra, MSSU Pa, Shillonga a accident avanga phum, a tu leh fa ten a ruhro an phum nawnna.
K. Zawla, Mizo Historian.
Nute-i, Mizo hmeichhe Matric pass hmasa ber.
D.|hianga, Kohhran Pharmacist hmasa ber.
Laimana, Lunglei lam MNF hotu ber Aizawl a lo zin, MNF Movement avanga thi hmasa ber. January 1, 1966 Inrinni zanah Aizawl Tuikual Vengah kahhlum a ni. Kutthlaktute ngei Interview a ni a, a thlan laitu zing ami ngei Pu C.Hmingthanga pawh interview a ni.
Unknown 13s, IAF Jet Fighter-in March 5 & 6, 1966-a Aizawl a bomb avanga thi. Missionary Rev A.Roberts-a leh ATC zirlaiten an lakkhawma an phumna a ni. ATC zirlai tel ve ngei Rev. R. Vanbelan min hrilh.
Dec 11, 2024 khan INTACH-in Serkawn BCM Museum-a Pu Buanga te nupa thlanlung hlui London atanga an hmuhchhuah kan en a, Pu K.Lalsanga Ex-MLA in an zawn reizia leh Pathianin remhriatna a pek avanga an hmuh dante, Zorama lakchhuah an dil dante, lawng lian a an thawn dan te a sawi a, a va hlu em!
Heritage site leh Protected Monument ni tura humhalh zui dan tur chu INTACH leh Mission Veng Local Council te, Synod hial pawhin ngaihtuah zui a tha khawp ang. Thil hi kan ngaihpawimawh chuan a pawimawh mai a ni.