Kristian tihduhdahna duh loin
Congress-in kawng zawh dawn
India rama Kristian-te nekchep an nih avang leh chhan dang vangin Congress party chuan vawiin – Zirtawpni hian Aizawlah kawng an zawh dawn.
MPCC thupuangtu Lalbiakzama chuan, kum 2014 atanga central-a BJP a sawrkar hnu ah India ramah Muslim leh Kristian-te cheksawlh leh nekchepna a hluar a. Nikum Krismas vuakvetah phei chuan hmun tam takah biak ina inkhawm leh Krismas lam hawi cheimawi siam tihchhiat a nasa a, pastor leh kohhran hruaitute hnehsawh tak taka cheksawlhna hmuh tur a tam hle tih a sawi.
“An dan pangngaiin central BJP sawrkar hotute an ngawi tlat thei hian India ramah minority-te tan dikna rorel a awm tawh lo tih a tilang a. Tun ang zel a nih chuan a punlun tawlh tawlh dawn tih a chiang,” a ti.
India danpui Article 25-in dikna chanvo min pek min palzut sakna chu kan sepui ruah tawrh ngawt ngawt dawn nge, tia zawtin, “A chhan chu engpawh nise, kan state sawrkar hotute leh kan MP-te auchhuak ngam lo mah se, Kristian rama inchhalte hian kan dikna chanvo hum turin aw kan chhuah a hun tawh. A thua kan la beihlet theih lai hian tan la ang u,” Lalbiakzama hian a ti a. Kristian tawh phawt chuan kawngzawh hi tawiawm turin an ngen tih a sawi a ni.
Hei bakah hian Lengpui ram Indian Air Force kuta hralh chungchanga ZPM leh MNF inkara inpuhmawhna chu sawrkarin mipui hrilhfiah turin an phut a; ni 100 inhlawhna – MGNREGA thlak a, VB G-RAM-G hman turah state sawrkarin zaa 10 sum a tum ve ngai dawn ta chu kan state sawrkar tan tlin harsa tak tur a nih avangin, hemi duh loh lantirna hi a ni tel dawn, tiin kawng zawh chhan tur hi a sawi a ni.
Kristian tihduhdahna duh loin Congress-in kawng zawh dawn
