India rama Kristiante chunga thil thleng hrang hrangah an thlavang hauhna lam hawia hma laa, tawngka nei turin Congress party chuan chief minister Lalduhoma an ngen.
MPCC vice president John Siamkunga hoin Ningani khan MPCC hruaitute chuan chief minister hnenah hian ziakin thu an thlen a. CM aiawhin a personal secretary-in a lo dawng.
Hemi hnua thuthar thehdarhtute an kawmnaah MPCC vice president chuan, BJP kaihhruai sawrkarin Kristiante nekchepna hmarua atana Foreign Contribution (Regulation) Amendment Bill 2026 a chhawpchhuak chu tha lo a tiin, a tawp thlengin a dodal dawn tih a sawi a. A dodalna pawh July 21 khan an lo hmang tawh tih a sawi.
“BJP leh a thurualpui political party-ten thuneihna an chan hnu in FCRA hi nasa taka tih danglam a ni a. NGO leh Kristian pawl hrang hrangin ram pawn lama kan Kristian unaute atanga tanpuina sum kan dawn danah harsatna a siam phah. Mizorama kohhran leh NGO-te hi BJP sawrkar leh RSS duh dan anga FCRA dan tih danglam nasa taka tuar tur kan ni a, kan tuar mek bawk,” a ti.
Foreign Contribution (Regulation) Amendment Bill 2026 hi nasa taka Kristianten kan tawrh theih dawn avangin chief minister chu a rang thei ang bera hma la turin an ngen tih MPCC hruaitu hian a sawi a. An thu thlen zingah – he Bill hi Kristian-te leh NGO-te tan a that loh em avangin hnuk let tura nasa taka nawr turin chief minister kaihhruaina in kohhran hruaitute, NGO hruaitute leh political party tin hruaituten Prime minister hmuh nise, an tih thu a sawi.
FCRA Amendment Bill 2026 chu Parliament-a putluh a nih hunah Mizoram MP-ten a thatlohna leh dodalna thu sawi ngei se, vote thlak hunah pawh ‘hai’ mai loin, a dodal zawngin vote thlak se, tih an thlen bakah he Bill dodalna resolution hi Mizoram Legislative Assembly-ah pass a nih theihnan Special Assembly Session ko turin an ngen tih a sawi a ni.
“Heng kan thu thehluh hmang hian a rang thei ang bera hma la turin Mizoram CM kan ngen a. Kan ram, hnam leh sakhua thilah chuan kan tanrual tlat a ngai a, kan tana dan himlo em em FCRA Amendment Bill dodal kawngah pawh CM hona hnuaiah kohhran, NGO leh political party tin lungrual taka na taka hma kan lak ho a ngai. Kohhran ho kan tawngtairual thup thup hnu pawha Mizoram sawrkar ber a la ngawi tlat mai hi mak kan ti a, BJP kaihhruai NDA sawrkar hi kan lo hlau ta viau em ni tih hi kan zawhna a ni,” John Siamkunga hian a ti.
MPCC hian Ningani vek khan NEET exam zawhna putru chungchanga thu kal zelah larsap kaltlangin Prime minister hnenah lehkha an thehlut a. Union Education minister Dharmendra Pradhan bang tura phutna leh exam hrang hranga thil diklo thleng thin Parliament-a sawiho tura phutna a ni tih an sawi.
Kristiante thlavang hauh turin MPCC-in CM hnenah an ngen
