Rev Dr Ramengliana
1. Thuthlung Hluia kan hmuh angin Sinai tlang Thu Sawm Pek (Ex 20:8-10) ah chuan Israel zawng zawng chu Sabbath serh tura thupek a ni a. Hei hi strict takin an kalpui a. Thuthlung Thar hunah pawh Judate (Isua leh zirtirte telin) chuan uluk takin an serh thin a ni tih kan hria. Pharisaite phei chuan an uar hle a nih kha.
2. Thu sawm pek zingah hian 9 te chu Thuthlung Thara sawi nawn leh tihngheh an ni a. Matthaia ziakah tualthah, uire, rukruk, hretu dera tan, leh nu leh pate chawimawi chungchang sawi a ni chauh a; Rom 13:9-ah awhna chungchang a sawi tel bawk. Uluk taka Pathian be tura zirtirna chuan thu sawm pek hmasa 3 hi a huapa ngaih a ni a. Thuthlung Tharah hian uar taka Sabbath serh tura inzirtirna hi a awm ta meuh lo va, Isua ngei pawh khan Sabbath lal a nihzia a sawi zawk a(Mt 12:8, ref Mk 2:27). A hun laia mite duh ang diak diak chuan a serh lem lo tih pawh kan hria a ni.
3. Thuthlung Hlui chuan Dan zawm sakhua a nih avangin Sabbath serh pawh a tel a. Mahse, Thuthlung Tharah erawh chuan Dan hnuaia awm lovin Khawngaihna hnuaiah kan awm thung (Rom 6:14-15). Sabbath chungchang zawng zawng chu Kristaah a famkim tawh a. Ani chu kan chatuan chawlhna a ni. Sabbath serh a la ngaih zel chuan Dan hnuaiah kan la awm tihna a ni ang. Thuthlung Hlui-a serh leh sang dan zawng zawng kha kan zawm ngai tawh lovin kan zalen tawh a, moral laws (nun dan tha) ho erawh kha chu Pathian duh zawng ti tura min kaihruaitu atan kan hmang tawh zawk a ni.
4. Sabbath serh leh serh loh hi buaina ber tur a ni tawh lo tih Thuthlung Tharah a lang chiang hle (Rom 14:1-12, Col 2:16,17; Tirh 20:7). I Kor 16:2 leh Thup 1:10-a kan hmuh Lalpa Ni hi Kristiante Chawlhni hi a ni ngeia ngaih a ni. Kristiante rilruah hian sabbath serh lam aiin Lalpa Ni (chawlhni) ngaih pawimawhna a thang nasa chho hle a ni. Thuthlung Thar ziah hun chhung ngeiah pawh Tirh 20:7; I Kor 16:2; Thup 1:10 -ah te hian Chawlhniin an inkhawm thin tih kan hre chiang thei a ni. Kum 115 AD leh 135 AD vela thuziakah chuan Chawlhni an serh tawh tih chiang takin a lang a, kum 500 AD-ah phei chuan tih dan phung pangngai a ni daih tawh a.
5. Kristian hmasa berte, Isua zirtirte leh midang, kha Juda vek an ni a. Juda sakhua kha chhuahsan turin an inngai miah lo va, chhuah san pawh an tum lo hrim hrim a nih kha. Mahse an Chanchin |ha hril awmzia leh nihphung an hre chiang telh telh a, Juda sakhua nen kha chuan a inrem fuh chiah thei lo tih an hre chho zel a, Juda sakhua atang chuan an inla hrang telh telh a. Jentail an tel tam telh telh bawk nen, Juda sakhaw zia an kalsan thui telh telha Sabbath aiin Chawlhni a lar zawk ta zel a ni. Kum zabi 2-naa Kohhran pate (Church Fathers) Justin Martyr, Ignatious, Irenius, Clement of Alexandria, leh zabi 3-naa mi Tertuliana te chu Sabbath serh duh lo tak vek an ni, an ti.
6. Kum zabi 2-na huna Kristian Pathian Biak Inkhawm dan chu Juda sakhaw thil nen danglam tak a ni tih a lang. Pathian thu (Tirhkohte lehkhathawn leh Chanchin |ha bute) an chhiar a; fakna hla an sa ho va; Sermon an ngaithla a; an tawngtai ho va; Lalpa Zanriah an kil ho thin. A juda tawh hlawl lo a ni ber mai. Juda mi chuan Juda sakhua Pathian biakna angin a ngai thei tawh dawn lo sa a ni. Chawlhniah hian hnathawh erawh an thulh kher chuang lo va, lal Constantinea thupek (321 AD) atanga an chin than chauh a ni, an ti bawk.
7. Chawlhni hi kan Lalpan sual thiltihtheihna leh thihna hneha a Thawhlehna ni a ni a, chumiah chuan thil engkim siam thar a lo ni a, Thlarau Thianghlim lo thlen (Pentecost) ni leh Kohhran din tanna ni a nih avangin Kristiante chuan kan serh a ni. Kristian te nihna (identity) atan hian a pawimawh em mai!
8. Kristianten Chawlhni serh tura kan inzirtir hian Sabbath serh dan kan entawn deuh ngei a, mahse Sabbath serhna rilru tak kha chu a ni tawh lem lo va. Kar tluan ni tin ni 7 chhunga thinlung taka Pathian be tura inzirtir hi kan tih dan zawk a ni a. Lalpa Niah (Chawlhniah) hian a huhova Pathian biakna (corporate worship) kan nei chauh zawk a ni a. Ni 6 chhunga kan khawsak dan hi Chawlhni hun kan hman dan hian a luah lan zo lo va, Chawlhni pawh hian ni 6 danga kan khawsak dan zawng zawng ai a awh zo chuang lo. Ni zawng zawng hi Lalpa tan a ni.
9. Chawlhniah erawh hi chuan kan taksate tihahdam a, kan rilrute Pathian lamah sawr bing a, kan ringtupui unaute nena inpawla hun hman hi kan thlarau nun tan a tha a. Pathian Thu ngaithlain, inzirtirna te a awm thin. Pathian lama intuaitharna hun pawimawh a ni a. Thlarau lam thilin hemi ni bika kan hun zawng zawng hi luah khat thin se a duhawm khawp mai. Chu chuan nun hrisel min pe zel dawn a ni.
10. Chawlhni hi serha Pathian lam thil ngaihsak zualna nia kan hman thiam telh telh hi kan nun atan a pawimawh hle a. Tunlai khawvel buai tawh takah hian chu chu kan hriat thar theuh a pawimawh hle. Sabbath serh rilru hrim hrim lam aiin Sabbath principle kan hman thiam a pawimawh dawn a ni. Chu chu Pathianin min phutna pawh a ni ngei ang. Pathian hre chang lo leka thil danga inhmang leh buaite hi chu an buai mah mah a ni ngei ang.
11. Kan Pathian hian kan neih sum leh pai atang chuan sawma pakhat (1/10) a phut tih kan hria a. Kan hun hman danah erawh pasariha pakhat (1/7) a phut thung. Hun chungchangah a phut lian zawk a ni tih hriain ama rawngbawlna, amah hnaihna, leh amah pawl nan kan hun i phal ang u.
12. Mi thenkhat chuan Sunday hi sun-god Mithra biak ni a ni a. Chu chu Kristianten kan zawm tak avangin ni (sun) chu kan be ve ta ang thawthangin an sawi thin. Hei hi sawi duh dan mak tak a nih hmel zawk a. Eng emaw ti tiin hmanlaia sun-god an biak ni nen a lo inang pawh ni sek sek se ni-pathian (sun-god) te zawng kan biak loh chian em hi! A date insut vanga kan buai dawn chuan buaina tur a tam dawn em mai!