Upate thil neih hlu chu an tawnhriat – Lalduhoma

Upate thil neih hlu chu an tawnhriat
– Lalduhoma
Upate thil neih hlu em em chu an tawnhriat a ni a, an awmna hmun theuhah thangtharte zirtirtu an ni vek tih chief minister Lalduhoma chuan a sawi.
Serchhip District Headquarters Mizoram Upa Pawl general assembly vawi 14 na chu Inrinni khan Serchhipah neih a ni a. Bialtu MLA ni bawk Lalduhoma hian hmanpuiin, ramah kum upa an tam a, mihring dam rei an tam chuan, chu ram chu ram tha leh changkang tihna tluk a ni a. Ram changkang leh changkang lo tehna pawimawh tak pakhat pawh ‘Life Expectancy at Birth’ niin, Human Development Index tehna hrui pawimawh tak a ni nghal bawk tih a sawi.
Pathian zawng tlattute chunga a malsawmna, Bible-a kan hmuh pakhat chu, “Kum tling takin i thlan i thleng anga, a huntea buh phal telkhawm tak ang mai hian” tih a nih thu sawiin, ruihhlo leh thildang vanga thalai boral an tam em em lai a, MUP member ni thei khawpa damrei an ni chu an vannei hle tih a sawi a ni.
“Upate thil neih hlu em em chu an tawnhriat (experience) hi a ni. Kan pi leh pute khan kum upa zawkte tawnhriat an ngaihlu a, engkimah upa zawkte an ngaichang hmasa zel thin. Chuvang chu a ni ang, val upa, lal upa tih tawngkam te kan neih phah ni. MUP member-te pawh in awmna hmun theuhah thangtharte zirtirtu in ni vek a, chhungkua leh khawtlang tan mi tangkai tak in ni vek a ni,” a ti.
An sawrkar ve leh Old Age pension an tihpun tur thu an puang a, state-in a tum ve lam an tisang ta dawrh a, category tinah Rs. 1000 theuh an pe a, central tanpuina nen chuan Rs. 1200 vel an dawng ta tih chief minister hian a sawi a. Chu chuan kum lama upa zawkte sawrkarin a ngaihthah loh zia a tichiang tih a sawi a ni.
MUP Serchhip District Hqrs hnuaiah hian Branch 66 awmin Area 10 ah an inthendarh a, an vaiin member 6202 an ni. An zinga 2842 chu mipa niin a dang 3360 chu hmeichhia an ni a; kum 80 chunglam 876 an awm.